جی ایچ ایم سی اسٹینڈنگ کمیٹی انتخابات کے لیےنامزدگیاں داخل

ذرائع کے مطابق آئندہ دو یوم کے دوران مجلس اور ٹی آر ایس میں نشستوں پر مفاہمت ہوجائے گی تو رائے دہی کی ضرورت نہیں ہوگی۔

مجلس بلدیہ عظیم تر حیدرآباد اسٹینڈنگ کمیٹی کے انتخابات کے لئے پرچہ نامزدگی کے ادخال کا عمل مکمل ہوچکا ہے اور جملہ 15اسٹینڈنگ کمیٹی ارکان کیلئے 18 نامزدگیاں وصول ہوئی ہیں جن میں تلنگانہ راشٹر سمیتی کی 11 اور مجلس اتحاد المسلمین کی 7 ہیں۔ نامزدگیوں کی تنقیح کا عمل 12نومبر کو ہو گا اور دستبرداری کی آخری تاریخ 15نومبر ہے۔

اگر کوئی دستبرداری اختیار نہیں کی جاتی ہے تو ایسی صورت میں 20نومبر کو ارکان بلدیہ اسٹینڈنگ کمیٹی کے انتخاب کے لئے رائے دہی میں حصہ لیں گے۔

ذرائع کے مطابق آئندہ دو یوم کے دوران مجلس اور ٹی آر ایس میں نشستوں پر مفاہمت ہوجائے گی تو رائے دہی کی ضرورت نہیں ہوگی۔ ٹی آر ایس ذرائع کے مطابق نشستوں کی تقسیم پر مفاہمت ہوجائے گی اور ٹی آر ایس کو 9 اور مجلس کو 7 اسٹینڈنگ کمیٹی کے ارکان حاصل ہوں گے ۔

بلدیہ کی جانب سے تنقیح اور رائے دہی کے سلسلہ میں تمام انتظامات مکمل کرلئے گئے ہیں لیکن اگر 3امیدوار اپنے پرچہ نامزدگیوں سے دستبرداری اختیار کرتے ہیں تو ایسی صور ت میں رسمی طور پر نتائج جاری کئے جائیں گے۔