حیدرآباد:تلنگانہ کے دارالحکومت حیدرآباد میں ایم ایس ایجوکیشن اکیڈیمی کے منیجنگ ڈائریکٹر انور احمد نے پریس کانفرنس سے خطاب کرتے ہوئے کہا کہ آج بڑا ہی خوشی کا دن ہے کہ ایم ایس کی جانب سے ٹیچرز ڈے کے موقع پر جو وعدہ کیا گیا تھا، وہ آج پورا ہوگیا اور ایم ایس ٹیچرز کا قافلہ عمرہ کے لئے روانہ ہوچکا ہے۔ انہوں نے مزید کہا کہ ایم ایس کی جانب سے ہر سال ٹیچرز ڈے کے موقع پر یہ سلسلہ جاری رہے گا اور غیر مسلم ٹیچرز کو دبئی کے سفر پر پانچ دن کے لیے بھیجا جائے گا۔
اس موقعے پر ایم ایس ایجوکیشن اکیڈیمی کے سینئر ڈائریکٹر ڈاکٹر معظم حسین نے کہا کہ عمرہ کے لئے منتخب ٹیچرس اور ان کے ہمراہ عمرہ کی سعادت حاصل کرنے والوں کی کل تعداد 50 افراد پر مشتمل ہے۔ ان کے علاوہ دیگر افراد پر مشتمل کل 70 افراد کا قافلہ آج صبح 5 بجے حیدرآباد کے ایئر پورٹ سے سعودی عرب کے لیے سفر پر روانہ ہوگیا ہے۔ اس سفر میں نئی دہلی سے 4 اور ممبئی سے 2 افراد قافلے میں شامل ہیں۔ اس طرح یہ قافلہ 76 عازمین عمرہ پر مشتمل ہے۔ یہ سفر کل 15 روزہ ہوگا۔ اس دوران 7 دن مکہ اور 7 دن مدینہ منورہ میں قیام رہے گا۔ قبل ازیں 21 نومبر ایم ایس کارپوریٹ آفس میں ایک اجلاس منعقد کیا گیا تھا جس میں عمرہ کے لئے منتخب ٹیچرز اور ان کے ساتھ جانے والوں کو مدعو کیاگیا تھا۔ MS Institute Teacher Left For Umrah