Mohammad Mehmood Ali ترقیاتی اسکیموں کے نفاذ پر وزیراعلی تلنگانہ سے تشکر کا اظہار

ریاستی وزیر داخلہ محمد محمود علی نے کہاکہ وزیر اعلیٰ کلوا کنٹلا چندرا شیکھر راؤ مسلمانوں کے حقیقی ہمدرد اور عملی سیکولر قائد ہیں۔ انہوں نے اقلیتوں بالخصوص مسلمانوں کے مسائل کو حل کرنے میں ہمیشہ پہل کی ہے۔

حیدرآباد: ریاست تلنگانہ کے وزیر داخلہ محمد محمود علی نے کہا کہ کے سی آر نے اسمبلی سیشن میں اعلان کیا کہ ریاست بھر میں دس ہزار ائمہ و موذنین کے علاوہ ماباقی 6 تا 7 ہزار ائمہ و موذنین کو بھی ماہانہ پانچ ہزار روپے دیا جائے گا۔ تاکہ ان کی معاشی مدد ہوسکے اور وہ بلا کسی فکر کے اپنے فرائض انجام دے سکیں۔

انہوں نے کہاکہ پری میٹرک اسکالرشب ماضی قریب تک مرکزی حکومت کے ذمہ تھی جس کو مرکزی حکومت نے بند کیا ہے. جس کی وجہ سے غریب طلبہ کو کافی پریشانیوں کا سامنا ہے۔ مگر وزیر اعلیٰ کلوا کنٹلا چندرا شیکھر راؤ نے وعدہ کیا کہ ریاستی حکومت کی جانب سے پری میٹرک اسکالرشب دی جائے گی۔ علاوہ ازیں گریٹر حیدرآباد میں قبرستانوں کے لیے 125 ایکڑ زمین بھی دی جائے گی۔

اس موقع پر وزیر داخلہ محمد محمود علی نے وزیر اعلیٰ کے سی آر کا شکریہ ادا کیا۔ اور کہا کہ ملک بھر میں ایسا قائد ملنا مشکل ہی نہیں ناممکن بھی ہے۔ انہوں نے کہا کہ کے سی آر مسلمانوں کے حقیقی خیرخواہ ہیں، جو مسلمانوں کی ترقی اور فلاح و بہبود کے لیے مسلسل کوشاں رہتے ہیں۔

محمد محمود علی نے کہا کہ ایک طرف مرکز کی بی جے پی حکومت ملک بھر میں ہندو مسلمان کی سیاست کرتے ہوئے سماج میں نفرت اور تشدد کو بڑھاوا دے رہی ہے تو دوسری طرف تلنگانہ کی بی آر ایس حکومت ریاست کے تمام طبقات کو ترقی دے رہی ہے۔