حیدرآباد: حیدرآباد پولیس نے بدھ کے روز مجلس اتحاد المسلمین کے رکن اسمبلی اکبر الدین اویسی کے خلاف ایک پولیس افسر کو اپنی ڈیوٹی انجام دینے سے روکنے کی کوشش کرنے اور مختلف گروہوں کے درمیان دشمنی کو فروغ دینے کے الزام میں مقدمہ درج کیا ہے۔ اکبر الدین اویسی کے خلاف سنتوش نگر پولیس اسٹیشن میں تعزیرات ہند (آئی پی سی) اور عوامی نمائندگی ایکٹ کی مختلف دفعات کے تحت مقدمہ درج کیا گیا۔
اکبر الدین اویسی نے اسی معاملے پر میڈیا سے بات کرتے ہوئے کہا کہ انہوں نے پولیس اہلکار کو دھمکی نہیں دی ہے۔ پولیس اہلکار نے وقت سے پہلے انہیں اشارہ کیا۔ اکبر الدین اویسی نے مزید کہا کہ پولیس اہلکار کو کسی کے کام میں مداخلت کرنے کا کوئی حق نہیں ہے۔ پولیس نے کسی کے عوامی ریلی کے دوران مداخلت کرنے کا کوئی جواز نہیں ہے۔
وہیں دوسری جانب پولیس انسپکٹر نے بھی میڈیا سے بات کرتے ہوئے کہا کہ اگر اس معاملے میں میری کوئی غلطی ہے تو میں ضرور معافی مانگ لوں گا اگر غلطی نہیں ہے تو مقدمہ درج ہوچکا ہے اور تحقیقات جاری ہے۔
اکبر الدین اویسی کے خلاف یہ کارروائی اس وقت ہوئی جب انہوں نے انتخابی ریلی کے دوران ایک پولیس افسر کو عوامی طور پر دھمکی دی تھی۔ پولیس اہلکار نے انہیں انتخابی ضابطہ اخلاق کے تحت مقررہ وقت سے تجاوز نہ کرنے کو کہا تھا۔
حیدرآباد کے للیتا باغ میں مجلس کے رہنما اکبر الدین اویسی ایک ریلی سے خطاب کر رہے تھے کہ اسی دوران پولیس اہلکار نے انہیں رک جانے کو کہا۔ جس پر اکبر الدین اویسی نے پولیس اہلکار سے کہا کہ وہ یہاں سے چلے جائے۔ اکبر الدین اویسی نے مزید کہا کہ "کیا آپ کو لگتا ہے کہ چھریوں اور گولیوں کا سامنا کرنے کے بعد میں کمزور ہو گیا ہوں، ابھی بھی مجھ میں بہت ہمت ہے، پانچ منٹ باقی ہیں اور میں پانچ منٹ تک خطاب کروں گا، مجھ کو کوئی نہیں روک سکتا، اگر میں اشارہ کردوں تو آپ کو دوڑنا پڑے گا''۔
مزید پڑھیں:اکبرالدین اویسی کے خلاف پولیس میں شکایت درج
مجلس کے رہنما اکبر الدین اویسی چندریان گٹہ حلقہ سے لگاتار چھٹی مرتبہ انتخاب لڑرہے ہیں۔ یہ حلقہ مجلس کا گڑھ رہی ہے۔ اکبر الدین اویسی سنہ 2004 سے اسی حلقہ سے مجلس کی نمائندگی کررہے ہیں۔ ریاست تلنگانہ میں اس بار سہ رخی مقابلہ ہونے جارہا ہے۔ بی آر ایس، کانگریس اور بی جے پی تینوں ہی انتخابات میں کامیابی کا دعوی کررہی ہے۔ کانگریس کو کرناٹک کی طرح تلنگانہ میں بھی کامیابی کی قوی امید ہے۔
