’مولانا کلب صادق امن کے علمبردار تھے’

مولانا کلب صادق کے انتقال پر حیدرآباد سے تعلق رکھنے والے صحافی جعفر حسین نے شدید رنج و غم کا اظہار کرتے ہوئے انہیں بھرپور خراج پیش کیا۔

مشہور شیعہ عالم دین مولانا کلب صادق کی موت کو صحافی جعفر حسین نے عالم کی موت سے تعبیر کیا اور کہا کہ ایسی عظیم شخصیت صدیوں میں ایک بار پیدا ہوتی ہے۔

جعفر حسین نے مولانا کلب صادق امن کا علمبردار قرار دیتے ہوئے کہا کہ انہوں نے اپنی زندگی کو اتحادالمسلمین کےلیے وقف کردیا تھا۔ مولانا کلب صادق کئی عرصہ سے آل انڈیا مسلم پرسنل لا بورڈ سے نہ صرف وابستہ رہے بلکہ انہوں نے نائب صدر کی حیثیت سے اپنی گراں قدر خدمات انجام دیں۔ انہوں نے کہا کہ مولانا کی خدمات کو کبھی فراموش نہیں کیا جاسکتا۔

انہوں نے کہا کہ مولانا کلب صادق ہمیشہ فرقہ پرست طاقتوں کے مخالف رہے اور ان کا ڈٹ کر مقابلہ کیا۔ وہ محض عالم نہیں تھے بلکہ انہوں نے سماج کو ایک نئی راہ دکھانے کا کام کیا۔ مولانا صرف مسلمانوں سے جڑے ہوئے مسائل پر بات نہیں کرتے تھے بلکہ وہ بلالحاظ مذہب و ملت ہر طبقہ میں مقبول تھے اور ان کے مسائل پر بات کیا کرتے تھے۔