تلنگانہ: پولیس اور ماؤنوازوں کے درمیان فائرنگ کا تبادلہ

تلنگانہ کے بھدرادری کتہ گوڑم میں آج صبح ممنوعہ کمیونسٹ پارٹی آف انڈیا (ماوسٹ) کے ارکان اور پولیس اہلکاروں کے مابین فائرنگ کا تبادلہ ہوا جس کے بعد فرار ہونے والے ماؤنوازوں کو پکڑنے کےلیے پولیس نے وسیع پیمانہ پر سرچ آپریشن شروع کیا ہے۔

بھدرادری کتہ گوڑم کے سپرنٹنڈنٹ آف پولیس سنیل دت نے بتایا کہ آج پولیس اور ماؤنوازوں کے مابین فائرنگ کا تبادلہ عمل میں آیا جس کے بعد تقریباً تیس ماوسٹ اپنا سامان چھوڑ کر جنگل میں فرار ہوگئے۔

اطلاعات کے مطابق ماؤنوازوں کی نقل و حرکت کی اطلاع ملنے کے بعد پولیس گذشتہ تین روز سے منگی اور اس کے اطراف کے جنگلات میں سرچ آپریشن میں مصروف تھی۔

کتہ گوڑم کے ملے پلی ٹوگو جنگلات میں پانچ سو پولیس جوانوں پر مشتمل 25 ٹیموں کی جانب سے مشترکہ آپریشن کیا گیا۔ قبل ازیں پولیس کو منگورو جنگلاتی علاقہ میں ماؤنوازوں کے چھپے رہنے کی اطلاع موصول ہوئی تھی۔

آپریشن کے دوران ٹوگو جنگلاتی علاقہ میں پولیس اور ماؤنوازوں کا سامنا ہوا جس کے بعد فائرنگ کا تبادلہ شروع ہوگیا۔

فائرنگ میں کسی کے ہلاک ہونے کی کوئی اطلاع نہیں ہے جبکہ ماؤنواز فرار ہونے میں کامیاب ہوگئے۔ پولیس نے اپنا آپریشن جاری رکھا ہے۔

ریاست میں پولیس کو گذشتہ چھ سالوں سے ماؤنوازوں کی سرگرمیوں کو روکنے میں بڑی حد تک کامیابی ملی ہے تاہم چھتیس گڑھ اور مہاراشٹرا سے متصلہ علاقوں میں ممنوعہ تنظیم اپنی سرگرمیوں کو بحال کرنے کی فراغ میں ہے۔