MANUU Distance Courses Registration مولانا آزاد نیشنل اردو یونیورسٹی میں فاصلاتی فالو آن کورسز میں رجسٹریشن

مولانا آزاد نیشنل اردو یونیورسٹی، نظامت فاصلاتی تعلیم کے فالو آن کورسز میں رجسٹریشن شروع ہوگیا ہے۔ جس کی آخری تاریخ 6 مئی ہے۔

حیدرآباد: مولانا آزاد نیشنل اردو یونیورسٹی، نظامت فاصلاتی تعلیم کے فالو آن کورسز میں رجسٹریشن کے لیے فیس کا پورٹل 6 مئی 2023 تک کھلا رہے گا۔ پروفیسرمحمد رضا اللہ خان، ڈائرکٹر، نظامت فاصلاتی تعلیم کے بموجب ایم اے (عربی) اور بی اے، بی ایس سی، بی کام (2020 کے سمسٹر بیچ اور 2019 سمسٹر بیچ کے مابقی طلبہ) اپنا رجسٹریشن کروا سکتے ہیں۔ مزید تفصیلات کے لیے یونیورسٹی ویب سائٹ www.manuu.edu.in/dde ملاحظہ کریں۔

دوسری جانب مولانا آزاد نیشنل اُردو یونیورسٹی کو محکمہ باغبانی ، حکومت تلنگانہ سے 7 ویں گارڈن فیسٹول اور پہلے فارمنگ فیسٹول میں بہترین باغات کے زمرہ میں پہلا انعام حاصل ہوا۔ تلنگانہ کے وزیر زراعت و باغبانی ایس نرنجن ریڈی نے 15 اپریل کو باغ عامہ ، حیدرآباد میں منعقدہ ایک تقریب میں گولڈ گارڈن ایوارڈ اور سرٹیفکیٹ یونیورسٹی کے ایگزیکیٹو انجینئر ناگیشور ریڈی، انجینئرنگ سیکشن کے حوالے کیا۔ سید عبدالقدیر، انچارج ہارٹیکلچر، مانو ان کے ہمراہ تھے۔ اس موقع پر ڈاکٹر پلا راجیشور ریڈی، ایم ایل سی و صدر نشین رعیتو بندھو سمیتی بحیثیت مہمانِ اعزازی موجود تھے۔

پروفیسر سید عین الحسن، وائس چانسلر اور پروفیسر اشتیاق احمد، رجسٹرار نے منفرد ایوارڈ کے حصول پر مانو برادری بالخصوص انجینئرنگ سیکشن کو مبارکباد دی۔ ناگیشور ریڈی نے آج وائس چانسلر سے ایوارڈ کے ساتھ ملاقات کی۔پروفیسر عین الحسن نے امید ظاہر کی کہ مستقبل میں بھی یونیورسٹی میں اسی طرح سرسبزی و شادابی برقرار رہے گی۔ اردو یونیورسٹی نے مرکزی حکومت کے تعلیمی اداروں کی جانب سے باغات کے مینٹیننس کے زمرہ میں فیسٹول میں حصہ لیا تھا۔ اس سلسلے میں محکمہ کی ایک ٹیم نے 23 جنوری 2023 کو اردو یونیورسٹی کا دورہ کرتے ہوئے یہاں موجود باغات، شجر کاری، سرسبزی کا معائنہ کیا تھا۔

یو این آئی