عاشق کی جانب سے شادی سے انکار پر ایک نوجوان لڑکی نے سینی ٹائزر پی کر خودکشی کرلی۔خودکشی سے قبل لڑکی نے سیلفی ویڈیو تیار کرتے ہوئے اس کے ساتھ ہوئے دھوکہ کا الزام لگایا اور کہا کہ پولیس نے بھی اس کا ساتھ نہیں دیا۔
یہ واقعہ تلنگانہ کے کھمم ضلع میں پیش آیا۔ضلع کے بوناکل منڈل کے چیرونومولا گاؤں میں منگل کی رات سندھو نامی لڑکی نے سینی ٹائز ر پی کر خودکشی کرلی۔ سندھو قریب میں واقع روینوتھل گاوں کے رہنے والے وینو کے ساتھ چار سال سے محبت کرتی تھی۔
دس دن قبل سندھو نے مقامی پولیس اسٹیشن میں وینو کے خلاف شکایت درج کروائی تھی جس میں اس نے الزام لگایا تھا کہ اس نے اسے جسمانی طور پر استعمال کیا اور شادی کرنے کا وعدہ کرتے ہوئے دھوکہ دیا ہے تاہم پولیس کی جانب سے اسے انصاف نہیں ملا۔اس سے قبل سندھونے دو بار اپنے عاشق کے گھر کے سامنے انصاف کرنے کی درخواست کرتے ہوئے دھرنا دیا تھا۔ اس کے باوجود بھی کوئی نتیجہ برآمد نہیں ہوا۔ اس کی وجہ سے اس نے زندگی سے بیزار ہوکر خودکشی کرلی۔
اس نے خودکش نوٹ بھی چھوڑا جس میں کہا گیا ہے کہ اس کے عاشق کے والدین نہیں چاہتے تھے کہ وہ اس سے شادی کریں کیونکہ وہ دلت طبقہ کے غریب خاندان سے تعلق رکھتی ہے اس لیے وہ خودکشی کررہی ہے اس نے عاشق اور اس کے گھر والوں کے خلاف سخت کارروائی کرنے کا مطالبہ کیا۔
یواین آئی