کرنل کے اہل خانہ کو اراضی کے دستاویزات دیے گئے

گلوان وادی میں چینی افواج کے ساتھ جھڑپ میں ہلاک ہونے والے کرنل سنتوش بابو کے اہل خانہ کو دی گئی اراضی کی مارکٹ ویلیو 20 کروڑ روپئے بتائی گئی ہے۔

تلنگانہ حکومت نے چینی فوج کے ساتھ تصادم میں ہلاک ہوئے کرنل سنتوش بابو جن کا تعلق تلنگانہ کے ضلع سریاپیٹ سے ہے، کی اہلیہ کو حیدرآباد کے بنجارہ ہلز میں زمین الاٹ کی۔

ریاستی وزیر جگدیش ریڈی نے کرنل سنتوش بابو کے ارکان خاندان کو اراضی کے دستاویزات حوالے کئے۔

حکومت نے حیدرآباد کے شیخ پیٹ زون میں اپنی پسند کی اراضی کی نشاندہی کرنے کی ان کے خاندان کو تجویز پیش کی۔ ضلع کلکٹر شویتا ماہنتی نے کرنل کے خاندان کو الاٹ کردہ اراضی کا معائنہ کیا۔

شیخ پیٹ زون میں تین مقامات میں سے کسی کا بھی انتخاب کرنے کی تجویز حکومت نے ہلاک شدہ فوجی کے اہل خانہ کو دی تھی جس کے بعد بنجارہ ہلز کا انتخاب کیا گیا۔

حکام نے آج اراضی کے دستاویزات کرنل کی اہلیہ سنتوشی کو دیے۔

اس اراضی کی مارکٹ ویلیو 20 کروڑ روپئے بتائی گئی۔

واضح رہے کہ وزیراعلی کے چندرشیکھر راو نے ضلع سریاپیٹ پہنچ کر ملک کے لیے قربان فوجی کے اہل خانہ سے ملاقات کی اور چیکس بھی حوالے کیے۔