بی جے پی حکومت تلنگانہ میں تمام گھوٹالوں کی تحقیقات کرائے گی: امت شاہ

ریاست تلنگانہ میں اسمبلی انتخابات کے پیش نظر تمام سیاسی پارٹیاں متحرک ہوگئی ہیں۔ کانگریس اور بی جے پی ریاست کی حکمراں پارٹی بی آر ایس پر بدعنوانی کے مختلف الزامات عائد کررہے ہیں۔ Amit Shah targets kcr ahead Assembly Elections 2023

حیدرآباد: مرکزی وزیر داخلہ امت شاہ نے جمعہ کو تلنگانہ میں کہا کہ بی جے پی حکومت تمام گھوٹالوں کی تحقیقات کرائے گی اور مجرموں کو جیل میں ڈالے گی۔ تلنگانہ کی آرمور اسمبلی میں ایک زبردست ریلی سے خطاب کرتے ہوئے امت شاہ نے الزام لگایا کہ بی آر ایس سپریمو اور وزیراعلیٰ کے سی آر ہزاروں کروڑ روپے کے گھوٹالوں میں ملوث ہیں۔ انہوں نے کہا کہ کے سی آر کو لگتا ہے کہ کچھ نہیں ہوگا، لیکن ان کا وقت آگیا ہے۔ انہوں نے کہا کہ کے سی آر کی پارٹی میں نامزدگی سودے بھی کئے جاتے ہیں۔ مسٹر شاہ نے کہا کہ بی آر ایس حکومت نے 10 سالوں میں تلنگانہ کو برباد کردیا ہے۔

مرکزی وزیر داخلہ امت شاہ نے کہا کہ کے سی آر نے اپنے کسی بھی وعدے پر عمل نہیں کیا ہے اور اپنے بیٹے اور بی آر ایس کے کارگزار صدر کے ٹی آر کے لیے ہزاروں کروڑ روپے کی بدعنوانی کے علاوہ کچھ نہیں کیا ہے۔ انہوں نے کہا کہ تلنگانہ میں بی آر ایس ایم ایل اے نے بس ڈپو کے لیے مختص زمین پر قبضہ کر لیا ہے اور اس میں ایک شاپنگ سنٹر بنالیا ہے۔

واضح رہے کہ تلنگانہ میں اسمبلی انتخابات کے پیش نظر سیاسی پارٹیوں کی انتخابی مہم زروں پر ہے۔ بی آر ایس سمیت بی جے پی اور کانگریس تلنگانہ میں اقتدار حاصل کرنے کے لئے کوشاں ہے۔ بی آر ایس دعوی کررہی ہے کہ وہ ریاست میں دوبارہ اقتدار حاصل کرلے گی۔ جبکہ کانگریس پارٹی بھی کرناٹک کی طرح تلنگانہ میں کامیابی کا دعوی کررہی ہے۔

یو این آئی