دیشا کے قاتلوں کو سرعام سزا دیں: جماعت اسلامی ہند خواتین ونگ کا مطالبہ

جماعت اسلامی ہند تلنگانہ کی خواتین ونگ نے شمس آباد میں پیش آئے ویٹرنری ڈاکٹر کے قتل میں ملوث خاطیوں کو سر عام سزا دینے کا مطالبہ کیا ہے۔

جماعت اسلامی کی خواتین ونگ نے حیدرآباد میں نیکلس روڈ چوراہے پر احتجاج منظم کرتے ہوئے اس واقعے پر شدید برہمی کا اظہارکیا۔ اس دوران بینر اور کارڈز کے ذریعے حکومت اور عوام تک مختلف پیغامات پہنچانے کی کوشش کی گئی، جس میں قاتلوں کو سزا کے علاوہ شراب اور مخرب الاخلاق مواد پر پابندی عائد کرنے کا پرزور مطالبہ کیا-

صدر خواتین ونگ ظہیر النساء نے ویٹرنری ڈاکٹر کے واقعہ پر شدید برہمی ظاہر کی اور سوال کیا کہ حکومت اس طرح کے واقعات پر برق رفتاری سے کاروائی کیوں نہیں کرتی۔ انہوں نے کہا کہ اس طرح کے واقعات میں سرعام سزا دینے کی ضرورت ہے تاکہ اس طرح کے واقعات کا سد باب ہو سکے۔

نائب صدر اسماء نے ٹی وی اور انٹرنیٹ پر موجود مخرب الاخلاق مواد پر پابندی عائد کرنے کو وقت کی اہم ضرورت قرار دیتے ہوئے اسے حادثے کی اصل وجہ بتایا۔ شراب کو برائیوں کی جڑ قرار دیتے ہوئے اسماء نے کہا کہ حکومت ایک طرف شراب کو فروغ دیتی ہے اور دوسری جانب جرائم کے سدباب کے وعدے کرتی ہے جبکہ شراب پر پابندی عائد کئے بغیر اس طرح کے جرائم پر قابو پانا ناممکن ہے۔