تلنگانہ میں کانگریس کی سونامی روکنے کیلئے آئی ٹی چھاپے: ریونت ریڈی

تلنگانہ میں ایک جانب سیاسی پارٹیاں زور و شور سے انتخابی مہم میں مصروف ہیں تو دوسری جانب مرکزی جانچ ایجنسیاں اور محکمہ انکم ٹیکس الرٹ ہیں۔ آج بھی تلنگانہ کے کئی مقامات پر محکمہ انکم ٹیکس نے چھاپہ ماری کی ہے۔ کانگریس لیڈروں کے ٹھکانوں پر انکم ٹیکس کے چھاپوں پر ریونت ریڈی نے مرکزی و ریاستی حکومت کو نشانہ بنایا ہے۔ Assembly Elections in Telangana

حیدرآباد: تلنگانہ کانگریس کے سربراہ ریونت ریڈی نے پالیروکے کانگریس امیدوار پی سرینواس ریڈی کی قیامگاہوں پر آئی ٹی کے آج صبح چھاپوں پر ردعمل ظاہر کرتے ہوئے مرکزی ایجنسی کی جانب سے ریاست کی اصل اپوزیشن جماعت کے امیدواروں کو نشانہ بنانے کا الزام لگایا۔انہوں نے سوشیل میڈیا کے اہم پلیٹ فارم ایکس پر اس سلسلہ میں ایک ٹوئیٹ کرتے ہوئے پوچھا کہ آئی ٹی کی ٹیموں کی جانب سے بی جے پی اورریاست کی حکمران جماعت بی آرایس کے امیدواروں کے مکانات پر چھاپے کیوں نہیں مارے جاتے؟انہوں نے کہاکہ گذشتہ روز پارٹی امیدوار ٹی ناگیشورراو اور آج پی سدھاکرریڈی کے مکانات پر چھاپے مارے گئے۔انہوں نے دعوی کیا کہ وزیراعظم مودی خوفزدہ ہیں کیونکہ ریاست میں کانگریس کی سونامی آنے والی ہے۔یہ چھاپے دراصل اس سونامی کوروکنے کی سازش ہے۔ انہوں نے کہاکہ وہ اس کارروائی کی شدید مذمت کرتے ہیں۔انہوں نے کہاکہ کانگریس کی سونامی میں کار(بی آرایس کا انتخابی نشان) اور کمل(بی جے پی کا انتخابی نشان) بہہ جائیں گے۔

تلنگانہ میں 30 نومبر کو تمام اسمبلی حلقوں کے لئے انتخابات منعقد ہوں گے۔ اعلامیہ کے مطابق پرچہ نامزدگی داخل کرنے 10 نومبر تک قبول کی جائیں گی۔ پرچہ نامزدگی داخل کرنے والے امیدواروں کے کاغذات کی جانچ 13 نومبر کو ہوگی جبکہ نامزدگی واپس لینے کی آخری تاریخ 15 نومبر ہے۔