'تلنگانہ کے ایک قطرہ پانی پر بھی سمجھوتہ نہیں کیا جائے گا' وائی ایس شرمیلا

وائی ایس شرمیلا نے دونوں تلگو ریاستوں کے درمیان پانی کے تنازعہ پر کہا کہ تلنگانہ کے ایک قطرہ پانی پر بھی سمجھوتہ نہیں کیا جائے گا۔ ضرورت پڑنے پر وہ کسی کے بھی خلاف لڑائی کے لئے تیار ہیں۔

آندھراپردیش حکومت نے رائلسیما لفٹ اریگیشن اسکیم کے کاموں کا آغاز کیا، جس پر تلنگانہ حکومت اور تلنگانہ کی تمام جماعتوں کے رہنماؤں کی جانب سے اعتراض کیا جارہا ہے اور آندھراپردیش کو تنقید کا نشانہ بنایا جارہا ہے۔

آنجہانی وزیر اعلیٰ وائی ایس راج شیکھر ریڈی کی دختر وائی ایس شرمیلا تلنگانہ میں نئی پارٹی تشکیل دے کر سرگرمیوں کا آغاز کرچکی ہیں اور مختلف مسائل پر وزیراعلیٰ کو تنقید کا نشانہ بنارہی ہیں۔ پریشان حال عوام سے ملاقات کررہی ہیں۔ جب کہ ان کے بھائی جگن موہن ریڈی آندھراپردیش کے وزیراعلیٰ ہیں۔

پانی کے تنازعے پر سیاسی جماعتوں کے رہنما اور عوام شرمیلا کے ردعمل کا انتظار کررہے تھے۔ شرمیلا نے اس مسئلہ پر اپنے ردعمل کا اظہار کرتے ہوئے واضح کردیا کہ وہ تلنگانہ اور اس کے مفادات سے ہونے والی ناانصافیوں پر خاموش نہیں رہیں گی۔ انہوں نے بالواسطہ کہا کہ وہ ضرورت پڑنے پر اپنے بھائی کے خلاف جاسکتی ہیں۔ اس مسئلہ پر شرمیلا نے ایک ٹویٹ کرتے ہوئے واضح کردیا کہ تلنگانہ سے ہونے والی ناانصافیوں کو برداشت نہیں کریں گی۔