حیدرآباد: مین ہول میں بہہ جانے والے سافٹ ویر انجینئر کی تلاش جاری

گولڈن ٹمپل علاقہ میں ایک سافٹ ویر انجینئر حادثاتی طور پر مین ہول میں گرنے کی وجہ سے بہہ گیا تھا، جس کی تلاش کا کام گریٹرحیدرآباد میونسپل کارپوریشن (جی ایچ ایم سی) اور ڈی آرایف کی ٹیمیں سرگرمی سے کررہی ہیں۔

حیدرآباد میں ہفتے کی شب کئی گھنٹوں تک ہوئی طوفانی بارش کے دوران منی کونڈا علاقے میں ایک شخص کھلے مین ہول میں گرنے کے بعد بہہ گیا۔

اس شخص کے مین ہول کے گڑھے میں گرنے کے دوران پانی کا بہاو شدید تھا جو اس کو بہا کرلے گیا۔ یہ واقعہ کل شب 9 بجے پیش آیا۔ یہ شخص سڑک کو عبور کررہا تھا جہاں پر پائپ لائنس کھلی ہوئی تھیں۔ اس واقعہ کا ویڈیو قریب کی ایک عمارت سے ایک شخص نے لیا جو تیزی کے ساتھ وائرل ہورہا ہے۔بہہ جانے والے شخص کی تلاشی کا کام ڈی آرایف اور جی ایچ ایم سی کی ٹیمز کررہی ہیں۔

تقریبا دو ماہ سے اس علاقہ میں ڈرینج کے کام کئے جارہے تھے اور تاریکی ہونے کی وجہ سے اس شخص کو یہ کھلے مین ہولس دکھائی نہیں دیئے جس کے نتیجہ میں وہ اس میں گرکر بہہ گیا۔ اس بہہ جانے والے شخص کی شناخت 42 سالہ رجنی کانت کے طورپر کی گئی ہے۔مقام واقعہ سے تقریبا 50میٹر کی دوری پر اس کا مکان ہے۔وہ شادنگر کی نووا گرین کمپنی میں ملازم ہے۔

یواین آئی