وزیر صحت نے میڈیا کے نمائندوں سے بات چیت کرتے ہوئے کہا کہ وزیر اعلی کے چندر شیکھر راؤ کی اولین ترجیح ریاست کے عوام کو کورونا سے بچانا ہے۔
انہوں نے ریاست میں کورونا کیسز میں اضافہ پر تشویش کا اظہار کیا۔ رام نومی کے موقع پر وزیر صحت نے حضور آباد میں سیتا رام کلیان اتسوم میں شرکت کی۔
انہوں نے کہا کہ عوام کو حکومت کی جانب سے جاری کردہ گائیڈ لائینس پر سختی سے عمل کرنا چاہئے ۔ راجندر نے کہا کہ کورونا کے علاج سے بہتر عوام کی احتیاط ہے۔ اگر ہر شخص کورونا قواعد پر عمل کرنے لگ جائیں تو دوسری لہر کو کمزور کیا جاسکتا ہے۔
انہوں نے کہا کہ گزشتہ ایک ہفتہ میں کیسزکی تعداد میں اضافہ درج کیا گیا اور حکومت نے سرکاری دواخانوں میں آکسیجن اور بستروں کی فراہمی پر توجہ مرکوز کی ہے۔ راجندر نے کہا کہ آکسیجن اور بستروں کے بارے میں پھیلائی جانے والی افواہوں پر عوام توجہ نہ دیں۔ سرکاری دواخانوں میں علاج کی بہتر سہولتیں موجود ہے۔
انہوں نے کہا کہ وزیراعلی بہت جلد صحت یاب ہوجائیں گے اور عوامی خدمات میں مصروف ہوجائیں گے۔ انہوں نے تلنگانہ میں کورونا ویکسین کی قلت کی اطلاعات کو مسترد کردیا۔ انہوں نے کہا کہ مرکز سے مزید ویکسین کےلیے درخواست کی گئی ہے کیونکہ 18 سال سے ویکسین کی خوراک دینے کا فیصلہ کیا گیا ہے۔
وزیر صحت نے کہا کہ دواخانوں میں آکسیجن کی فراہمی کیلئے مرکز سے تعاون کی درخواست کی گئی ۔ انہوں نے بتایا کہ سرکاری دواخانوں میں ریمیڈی سیور انجکشن دستیاب رکھا گیا ہے ۔ انہوں نے ڈاکٹرز کو مشورہ دیا کہ وہ آکسیجن کا غیر ضروری استعمال کرتے ہوئے ضائع نہ کریں۔ انہوں نے کہا کہ وزیراعلی کے سی آر اور وزیر آئی ٹی کے ٹی آر نے انہیں ہسپتالوں میں آکسیجن کی سربراہی کے بارے میں توجہ دلائی ہے۔
