عاشق کیلئے سیل ٹاور چڑھ جانے والی لڑکی کی آخر کار پولیس نے اس کے عاشق سے شادی کرا ہی دی۔ یہ واقعہ تلنگانہ کے ورنگل ضلع کے پیگڑا پلی میں پیش آیا۔
ورنگل اربن ضلع کے حسن پرتی سے تعلق رکھنے والی پرائیویٹ نرس مالیکا اور مقامی نوجوان مہیش ایک دوسرے سے محبت کرتے تھے۔
ایک سال قبل نوجوان کو سنگارینی کالریز کوئلہ کی کان میں ملازمت حاصل ہوگئی۔ تب سے لڑکی شادی کیلئے دباؤ ڈال رہی تھی۔
اس دوران لڑکی کو پتہ چلا کہ اسکے عاشق کی کسی اور لڑکی سے منگنی کردی گئی ہے جس پر لڑکی برہم ہوگئی اور عاشق سے شادی کرنے کا مطالبہ کرتے ہوئے کل سیل ٹاور پرچڑھ گئی۔
اس نے دھمکی دی تھی کہ اگر اس نوجوان سے اس کی شادی نہیں کرائی گئی تو وہ سیل ٹاور سے کود جائے گی۔
اس واقعہ کے ساتھ ہی علاقہ میں سنسنی پھیل گئی تھی اور بڑی تعداد میں لوگ اس لڑکی کو دیکھنے کے لیے جمع ہوگئے تھے، جنہوں نے اس کو نیچے اتارنے کی کوشش کی،بالاخر ان تمام کی کوششوں سے لڑکی نیچے اتر گئی۔
اس کو پولیس اسٹیشن لے جایا گیا بعد ازاں نوجوان کو لایا گیا اور پولیس کی موجودگی میں ان دونوں کی شادی انجام پائی۔