Laid Foundation Of Eid Gah: بھونگیر میں عید گاہ کا سنگ بنیاد رکھا گیا

وزیرداخلہ محمد محمود علی تلنگانہ کے ضلع بھونگیر میں عید گاہ کا سنگ بنیاد رکھا۔ اس موقعے پر انہوں نے بتایا کہ وقف املاک کے تحفظ اور ترقی اور ان سے متعلق تنازعات کو حل کرنے کے لیے حکومت تلنگانہ نے"تلنگانہ اسٹیٹ وقف ٹریبونل" تشکیل دیا ہے۔

حیدرآباد:ریاستی وزیر داخلہ محمد محمود علی نے بھونگیر میں جدید عید گاہ کا سنگ بنیاد رکھا اور وقف جائیداوں سے متعلق بات کرتے ہوئے کہا کہ وقف جائیدادیں اللہ کی امانت ہوتی ہیں، ان میں کسی قسم کی خیانت یا دھاندلی نہیں کی جانی چاہیے، ورنہ اللہ تعالی انہیں دنیا اور آخرت میں ذلیل و خوار کرے گا۔ انہوں نے وقف املاک کے تحفظ اور ترقی کے متعلق کہا کہ وقف املاک کے تنازعات کو فوری حل کرنے کے لیے حکومت تلنگانہ نے "تلنگانہ اسٹیٹ وقف ٹریبونل" تشکیل دیا ہے تاکہ اس بات کو یقینی بنایا جائے کہ غیر مجاز منتقلی کی کوئی گنجائش نہ ر ہے۔

وقف جائیدادوں کے رجسٹریشن یا وقف املاک کے غلط استعمال سے محفوظ رکھنے کیلئے وقف کی ملکیت کو "آٹو لاک" کے تحت رکھا گیا اور ایسی جائیدادوں کے لیے رجسٹریشن ماڈیول کو آن لائن میں غیر فعال کر دیا گیا۔تمام متعلقہ حکام کو وقف املاک میں تعمیرات کے لیے بلڈنگ پرمٹ جاری نہ کرنے کی ہدایت دی گئی۔انہوں نے کہا کہ حکومت نے اضلاع میں "ضلع وقف تحفظ اورکوآرڈینیشن کمیٹی" کا قیام عمل میں لایا۔ اوربطور چیئرمین، ضلع کلکٹر کو مقرر کیا گیا۔

ساتھ ہی ساتھ محکمہ ریونیو، پولیس، میونسپل، رجسٹریشن کے محکمہ جات کے عہدیداران کو وقف کے تحفظ کے لیے ضلعی کمیٹی میں بطور ممبرشامل کیا گیا۔ وزیر موصوف نے کہا کہ تشکیل تلنگانہ کے بعد سے تلنگانہ کے اقلیتی برادران کافی خوش ہیں۔ کیونکہ جو ترقی انہیں 65 سال میں میسر نہیں ہوئی وہ پچھلے نو سالوں میں حاصل ہوئی ہے۔مزید کہا کہ بھونگیر میں جدید عیدگاہ کی تعمیر کے لیے طویل عرصے سے کوششیں کی جارہی تھیں جس کو سابقہ حکومتوں نے نظر انداز کردیا، مگر تلنگانہ حکومت نے نہ صرف مسئلہ کو حل کیا بلکہ تعمیر میں بھی سنجیدگی دکھائی۔

انہوں نے کہا کہ بھونگیر کا جدید عیدگاہ ریاست بھر میں ایک عمدہ اور مثالی عیدگاہ ثابت ہوگا، وزیر داخلہ نے کہا کہ وزیر اعلیٰ چندراشیکھر نے ریاست تلنگانہ کو نو سال کے مختصر عرصے میں غیر معمولی ترقی دلائی ہے جس کی مثال ملک بھر میں نہیں ملتی۔ انہوں نے کہا کہ کے سی آر کے دور حکومت میں ریاست بھر میں امن و امان برقرار ہے۔ ریاست ہر قسم کے فسادات سے پاک ہے۔ محمد محمود علی نے اپنے خطاب میں امام و موذنین کے اعزازیہ کے بارے میں بات کرتے ہوئے کہا کہ حکومت تلنگانہ کی اس اسکیم سے 10,000 مستحقین مستفید ہورہے ہیں۔

اس اسکیم کے تحت فی کس ماہانہ -/5000 روپئے عطا کئےجارہے ہیں۔علاوہ ازیں تلنگانہ کی متعدد اسکیمات کا بھی ذکر کیا، اور کہا کہ حکومت تلنگانہ گنگا جمنی تہذیب پر نہ صرف یقین رکھتی ہے بلکہ اس پر عمل پیرا بھی ہے۔ اسی لیے ریاست میں تمام مذاہب کے تہواروں اور عیدوں کو خوش اسلوبی سے منانے کا اہتمام کیا جاتاہے، تاکہ بلالحاظ مذہب و ملت تمام افراد اپنے مذہبی تہواروں کو خوشی سے منائیں۔

وزیر موصوف نے کہا کہ تلنگانہ عوام بالخصوص اقلیتوں کو سیکولر ذہنیت کے قائدین کا ساتھ دینا ضروری ہے،تاکہ ہماری ریاست میں امن و سکون اور بھائی چارگی برقرار رہے۔ اس موقع پر رکن اسمبلی شیکھر ریڈی، وقف بورڈ چیرمن محمد مسیح اللہ خاں ، میونسپل چیرمن انجینیلو، لائبریری چیرمن امریندر گوڑ، کونسلر خواجہ عظیم الدین، پارٹی قائدین منور خاں، بدرالدین، مولانا بشیرالدین ،مولانا اکبراور دیگر شریک تھے۔