تلنگانہ اسمبلی انتخابات: قومی سیاسی لیڈران شدت کے ساتھ انتخابی مہم چلائیں گے

تلنگانہ میں تمام سیاسی پارٹیاں رائے دہندگان کو اپنی جانب راغب کرنے کے لیے ایڑی چوٹی کا زور لگا رہی ہیں۔ یہاں اسمبلی انتخابات کے لیے 30 نومبر کو ووٹ ڈالے جائیں گے۔ اس سے قبل تشہیر کے آخری تین دنوں میں تمام پارٹیوں کے قومی لیڈر ریاست بھر میں انتخابی ریلی کرتے نظر آئیں گے۔ Telangana Assembly Election 2023

حیدرآباد: تلنگانہ میں اس ماہ کی 30 تاریخ کو ووٹ ڈالے جائیں گے، جس کے لئے مناسب انتظامات کئے جارہے ہیں۔ دوسری طرف سیاسی جماعتیں لمحہ آخر بھی رائے دہندوں کو راغب کرنے کیلئے تمام تر کوششیں کررہی ہیں۔ تلگو ریاست میں انتخابی مہم کا اختتام اس ماہ کی 28 تاریخ کوہو رہا ہے جس کے پیش نظر ہر امیدوار اپنی کامیابی کیلئے پُر امید نظرآرہا ہے۔امیدواروں نے انتخابی مہم میں تیزی پیداکردی ہے، جلسوں، گروپ میٹنگس، کارنر میٹنگس اور رائے دہندوں سے ملاقاتوں کاسلسلہ ہر حلقہ میں جاری ہے۔ قومی جماعتوں بی جے پی اور کانگریس کے لیڈران بھی اس انتخابی مہم کا حصہ جلد ہی بننے جارہے ہیں۔ شمالی ہند کی دیگر ریاستوں میں اس ماہ کی 23 تاریخ کو انتخابات کی تکمیل کے بعد یہ لیڈران جنوبی ہند کی اس ریاست میں آخری تین دن کے دوران شدت کے ساتھ انتخابی مہم چلائیں گے۔ کانگریس کے لیڈران راہل گاندھی، پرینکاگاندھی کے ساتھ ساتھ دیگر قومی لیڈران بھی تلنگانہ کا دورہ کریں گے۔ کانگریس کی لیڈر پرینکا گاندھی جنہوں نے قبل ازیں بھی مہم چلائی تھی، ایک مرتبہ پھر تلنگانہ کا دورہ کرنے والی ہیں۔ وہ اس ماہ کی 24 تاریخ سے 28 تاریخ تک چار دنوں میں 20سے زائد انتخابی جلسوں سے خطاب کریں گی جبکہ ان کے بھائی راہل گاندھی بھی 24 تاریخ سے ریاست میں قیام کریں گے۔ وہ 26نومبر کو کاماریڈی میں انتخابی مہم سے خطاب کریں گے۔

دوسری طرف 24 تا 28 نومبر بی جے پی کی جانب سے وزیراعظم مودی کاماریڈی، مہیشورم، توپران، نرمل، محبوب آباد اور کریم نگر میں انتخابی مہم میں حصہ لیں گے۔ وہ حیدرآباد میں روڈ شو بھی کریں گے۔ علاوہ ازیں بی جے پی کے سینئر لیڈرومرکزی وزیرداخلہ امیت شاہ 24 ،26 اور 28 نومبر کو انتخابی مہم چلائیں گے۔ بی جے پی کے قومی صدر جے پی نڈا کے بشمول بی جے پی کے وزرائے اعلی یوگی آدتیہ ناتھ، ہیمانتا بسوا شرما بھی انتخابی مہم میں حصہ لیں گے۔ جنا سینا پارٹی کے صدر پون کلیان،بی جے پی اور جنا سینا کے امیدواروں کی حمایت میں آج سے حصہ لے رہے ہیں۔وہ 26نومبر کو حیدرآباد کے کوکٹ پلی میں امیت شاہ کے روڈ شو میں حصہ لیں گے۔

وہیں دوسری طرف سی پی ایم کے قومی سکریٹری سیتارام یچوری، پولیٹ بیورو رکن برنداکرت اور دیگر لیڈران نلگنڈہ، کھمم اضلاع کے علاوہ ریاستی دارالحکومت میں 25 ،26اور 27 نومبر کو سی پی ایم امیدواروں کی حمایت میں مہم چلائیں گے۔اس دوران اس ماہ کی 25 تاریخ کو بی آر ایس کے صدر و وزیراعلی کے چندر شیکھر راو حیدرآباد میں بڑے جلسہ سے خطاب کریں گے۔

(یواین آئی)