حیدرآباد: قبرستان میں نالے کا گندہ پانی داخل، قبروں کی بے حرمتی

ریاست تلنگانہ میں حیدرآباد کے پٹن چیرو میں واقع مسلم قبرستان میں ڈرینیج کا گندہ پانی داخل ہوگیا اور یہاں خنزیروں کی بہتات کی وجہ سے قبروں کی بےحرمتی ہورہی ہے۔ گندہ پانی قبرستان میں پھیل جانے کی وجہ سے تدفین میں بھی مشکلات پیش آرہی ہیں۔

مقامی لوگوں نے متعلقہ محکمہ جات سے قبرستان میں ڈرینج کے پانی کو داخل ہونے سے روکنے کا مطالبہ کیا۔ مقامی مسلمانوں نے قبرستان کی صفائی، گندے پانی کی نکاسی کے ساتھ ساتھ حصار بندی کی کرنے کا بھی عہدیداروں سے مطالبہ کیا۔

پٹن چیرو میں واقع 100 سالہ قدیم قبرستان دو ایکڑ اراضی پر محیط ہے۔ اس قبرستان میں درگاہ حضرت نظام الدین شہیدؒ بھی واقع ہے جہاں پر عقیدت مندوں کی کثیر تعداد حاضری کےلیے آتی ہے۔

اس کے علاوہ تدفین کے لیے میتیں لائی جاتی ہیں، قبرستان کی حالت زار انتہائی ابتر ہو چکی ہے۔

نالوں اور موریوں کے گندے پانی کی وجہ قبرستان جھیل کا منظر پیش کر رہا ہے۔ غلاظت کے پانی کی باعث جانور خصوصاً خنزیروں کی آماجگاہ میں تبدیل ہوگیا ہے۔

جنگلی جھاڑوں اور کچرے کی عدم نکاسی کی وجہ سے میتوں کی تدفین میں کئی مسائل اور دشواریاں پیش آ رہی ہیں۔

اس ضمن میں متعلقہ رکن اسمبلی مہیپال ریڈی، کارپوریٹر شنکر یادو، تلنگانہ اسٹیٹ وقف بورڈ، انتظامی کمیٹی جی ایچ ایم سی متعلقہ مختلف محکموں سے پانی کی نکاسی اور حصار بندی کے لیے کئی مرتبہ نمائندگی کی گئی، جو بے سود ثابت ہوئیں۔

عوام نے حصار بندی اور قبرستان کی صفائی کے انتظامات کرنے کا حکومت سے مطالبہ کیا۔