Telangana Electionتلنگانہ میں راہل گاندھی کی انتخابی مہم کا بس یاترا سے ہوگا آغاز

ریاست تلنگانہ میں 30 نومبر کو اسمبلی انتخابات ہونے والے ہیں جس کے پیش نظر تمام سیاسی پارٹیوں کی سرگرمیوں کا آغاز ہوچکا ہے۔ Congress's election campaign began in Telangana

حیدرآباد: کانگریس قائدین راہل گاندھی اور پرینکا گاندھی آج بس یاترا کے ساتھ تلنگانہ میں 30 نومبر کو ہونے والے اسمبلی انتخابات کے لئے پارٹی کی مہم کا آغاز کریں گے۔ کانگریس پارٹی کے دونوں رہنما سہ پہر 3:30 بجے خصوصی پرواز سے بیگم پیٹ ہوائی اڈے پر پہنچیں گے۔ اس کے بعد ہیلی کاپٹر سے رامپا مندر کے لیے روانہ ہوں گے۔

پارٹی ذرائع کے مطابق مندر میں پوجا کرنے کے بعد راہل گاندھی اور پرینکا گاندھی بس یاترا کا آغاز کریں گے اور بعد میں ایک ریلی سے خطاب کریں گے۔ اس دوران کانگریس کے دونوں رہنما خواتین سے بھی بات چیت کریں گے۔ ریلی کے بعد پرینکا نئی دہلی لوٹنے والی ہیں جبکہ راہل انتخابی مہم میں مصروف رہیں گے۔ ملوگو کے کانگریس کے رکن اسمبلی دناساری انسویا، جو سیتھاکا کے نام سے مشہور ہیں، نے خبر رساں ایجنسی سے بات کرتےہوئے کہا کہ راہل گاندھی آج رات بھوپال پلی میں قیام کریں گے۔

راہل گاندھی شام 4.30 بجے رامپا مندر پہنچیں گے اور تقریباً 5 بجے ایک جلسہ عام سے خطاب کریں گے۔ کانگریس رکن اسمبلی نے بتایا کہ اس کے بعد بھوپال پلی میں تقریباً 30 کلومیٹر تک بس یاترا ہوگی۔ کانگریس ذرائع کے مطابق 18 اکتوبر سے شروع ہونے والی 3 روزہ بس یاترا آٹھ حلقوں کا احاطہ کرے گی۔ راہل گاندھی سرکاری کانکنی کمپنی کے کارکنوں سے بھی ملاقات کریں گے۔

کانگریس رہنما راہل گاندھی 19 اکتوبر کو سنگارینی کلیری، پداپلی اور کریم نگر میں جلسوں سے خطاب کریں گے۔ 20 اکتوبر کو وہ جگتیال میں کسانوں کے اجلاس میں شرکت کریں گے۔ اس کے بعد راہل گاندھی آرمور اور نظام آباد سمیت دیگر مقامات کا دورہ کرکے ان علاقوں میں مختلف پروگراموں میں شرکت کریں گے۔ اپنے دورہ تلنگانہ کے دوران راہل گاندھی کا بودھن میں نظام شوگر فیکٹری کا دورہ کرنے اور ارمور میں ہلدی اور گنے کے کسانوں سے بات چیت کرنے کا بھی امکان ہے۔

واضح رہے کہ تلنگانہ میں اسمبلی انتخابات کے پیش نظر کانگریس پارٹی سرگرم ہیں۔ راہل گاندھی پرینکا گاندھی سمیت کانگریس کے کئی رہنما تلنگانہ کا دورہ کرچکے ہیں۔ راہل گاندھی اس سے پہلے بھی تلنگانہ میں عوامی جلسوں سے خطاب کرچکے ہیں۔