حیدرآباد: کانگریس رہنما راہل گاندھی نے کہا کہ تلنگانہ میں ایک لاکھ کروڑ روپے کی دولت لوٹی گئی ہے۔ کالیشورم پروجکٹ وزیراعلی کے چندر شیکھر راو اور ان کے خاندان کے لیے اے ٹی ایم بن گیا ہے۔اس اے ٹی ایم کو چلانے کیلئے تلنگانہ کے تمام خاندان ہر سال 31500روپئے سال 2040تک دیں گے۔ انہوں نے کہاکہ وزیراعلی نے عوام سے چوری کی ہے اور اس کی سب سے بڑی چوٹ خواتین کو لگی ہے۔ اسی لئے کانگریس نے فیصلہ کیا ہے کہ جتنی رقم عوام سے وزیراعلی نے چوری کی ہے، اتنی ہی رقم تلنگانہ کے عوام کے بینک کھاتوں میں کانگریس ڈالے گی۔ ہر ماہ ہر خاتون کے بینک کھاتہ میں 2500روپئے کانگریس حکومت ڈالے گی۔
انہوں نے جئے شنکر بھوپال پلی ضلع کے مہادیو پور منڈل، امباٹی پلی کا دورہ کیا۔ انہوں نے اس موقع پر منعقدہ خواتین کو بااختیار بنانے کے جلسہ سے خطاب کرتے ہوئے کہا کہ انتخابات میں بی آر ایس، بی جے پی اور مجلس ایک ہیں۔ یہ تمام پارٹیاں بی آر ایس کے حق میں کام کر رہی ہیں۔ اگر کانگریس اقتدار میں آتی ہے تو عوام سے کئے گئے وعدے پورے کئے جائیں گے۔ راہل گاندھی نے کہا کہ وہ جاگیرداروں کی حکومت کے بجائے عوام کی حکومت قائم کرنا چاہتے ہیں۔ انہوں نے کہاکہ وزیر اعظم مودی اور چندر شیکھر راو کے دور حکومت میں ایک گیس سلنڈر کی قیمت 1,200 تک پہنچ گئی۔ اگر کانگریس ریاست میں اقتدار میں آتی ہے تو ہم 500 روپے میں گیس سلنڈر فراہم کریں گے اور خواتین کو مفت بس سفر کی سہولت فراہم کریں گے۔