'جی ایچ ایم سی انتخابات میں بی جے پی کرے گی اپنی طاقت کا مظاہرہ'

مرکزی مملکتی وزیر داخلہ و بی جے پی کے سینیئر رہنما کشن ریڈی نے کہا ہے کہ گریٹر حیدرآباد میونسپل کارپوریشن (جی ایچ ایم سی)کے انتخابات میں ان کی پارٹی اپنی طاقت کا مظاہرہ کرے گی۔

کشن ریڈی نے حیدرآباد میں عنبرپیٹ کے بھرت پور علاقہ کا دورہ کیا جہاں بی جے پی کے ضلع صدر گوتم راو نے اپنی ذمہ داری سنبھالی۔

ایک پروگرام سے خطاب کرتے ہوئے کشن ریڈی نے کہا کہ کے چندر شیکھر راو کی زیر قیادت ریاستی حکومت سے لوگ ناراض ہیں۔ انہوں نے کہا کہ کے سی آر خاندان سے تلنگانہ کو اور اویسی خاندان سے حیدرآباد کو پاک کیا جائے گا۔

انہوں نے الزام لگایا کہ ٹی آرایس اس طرح کا رویہ اختیار کررہی ہے جیسے ریاست میں کسی اور پارٹی کا وجود ہی نہیں ہے۔

کشن ریڈی نے مزید کہا کہ بی جے پی جی ایچ ایم سی کے انتخابات میں اپنی طاقت کا مظاہرہ کرے گی۔ تلنگانہ کے تعلق سے عوام کے خواب پورے نہیں ہوئے ہیں۔