حیدرآباد (تلنگانہ) :آل انڈیا مجلس اتحاد المسلمین (اے آئی ایم آئی ایم) کے سربراہ اسد الدین اویسی نے ہفتہ کے روز وزیر اعلیٰ کے چندر شیکھر راؤ اور ان کے خاندان کی حمایت کرتے ہوئے بھارتیہ جنتا پارٹی کی سخت تنقید کی۔ یاد رہے کہ دارالحکومت دہلی کے شراب لائسنس معاملہ میں انفورسمنٹ ڈائریکٹوریٹ (ای دی) کی جانب سے تلنگانہ کے وزیر اعلیٰ کے سی آر کی دختر کے کویتا سے پوچھ کی جا رہی ہے۔ اے آئی ایم آئی ایم کے سربراہ اویسی نے کے سی آر کی زیر قیادت جامع ترقی کی راہ پر گامزن ریاست تلنگانہ کے وزیر اعلیٰ کو نشانہ بنانے پر بھارتیہ جنتا پارٹی کی سخت تنقید کی۔
اویسی نے ٹویٹ کرتے ہوئے کہا: ’’بی جے پی کے ممبران پارلیمنٹ نے مسلمانوں کے معاشی بائیکاٹ کا مطالبہ کیا ہے؛ انہوں نے لوگوں سے ہتھیار گھر پر رکھنے کو کہا ہے لیکن (اس کا محاسبہ لینے کے بجائے) مودی حکومت تلنگانہ کی جامع ترقی میں ان کی قیادت کے لیے تلنگانہ کے وزیر اعلیٰ اور ان کے خاندان کو نشانہ بنانے میں مصروف ہے۔‘‘ اویسی کا یہ تبصرہ دہلی شراب پالیسی کیس کے سلسلے میں انفورسمنٹ ڈائریکٹوریٹ کے ذریعہ کے سی آر کی بیٹی ’’کے کویتا‘‘ سے پوچھ گچھ سے قبل سامنے آیا ہے۔ ذرائع کے مطابق کویتا کو حیدرآباد کے تاجر ارون رام چندر پلئی کے آمنے سامنے بٹھایا جائے گا، جنہیں پیر کی رات شراب پالیسی کیس کے سلسلے میں گرفتار کیا گیا تھا۔