Asaduddin Owaisi یونیفارم سول کوڈ سے ملک کو نقصان ہوگا

حیدرآباد میں کل ہند مجلس اتحادالمسلمین کے صدر و رکن پارلیمان بیرسٹر اسدالدین اویسی نے کہاکہ لوک سبھا انتخابات سے قبل عوام کی توجہ منتشر کرنے کی خاطر یکساں سیول کوڈ کے مسئلہ کو اٹھایا گیا ہے

حیدرآباد: ملک کی تمام ریاستوں کی طرح تلنگانہ میں بھی یونیفارم سول کوڈ کو لے کر ہنگامہ شروع ہو چکاہے۔ ملی اور سیاسی رہنماوں کی جانب سے یونیفارم سول کوڈ کے سلسلے میں ردعمل اظہار کرنے کا سلسلہ جاری ہے۔ ریاست تلنگانہ کے حیدرآباد میں واقع کل ہند مجلس اتحاد المسلمین کے ہیڈ کوارٹر دارالسلام میں بیرسٹر اسد الدین اویسی نے نامہ نگاروں سے خطاب کرتے ہوئے کہاکہ اگر یکساں سول کوڈ ملک میں نافذ ہوتا ہے تو نا صرف مسلمان بلکہ دیگر مذاہب کے لوگوں کے لئے بھی نقصان دہ ہے ۔اس سے زیادہ نقصان ملک کو ہوگا۔

اویسی نے کہا کہ لا کمیشن کو پارٹی نے اپنے موقف سے واقف کرواتے ہوئے مکتوب روانہ کیا ہے۔ یونیفارم سول کوڈ نافذ کرنے سے تمام مذاہب کو نقصان پہنچے گا، جس میں آدی واسی، ہندو، مسلم، سکھ، جین، ایس سی، ایس ٹی و دیگر طبقات کو نقصان ہوگا۔ وزیراعظم نریندر مودی پر تنقید کرتے ہوئے اسدالدین اویسی نے کہا کہ ہمارے وزیر اعظم کہتے ہیں کہ ایک گھر میں دو قانون کیسے رہ سکتے ہیں۔

اسد الدین اویسی نے کہا کہ ہمارے ملک کے وزیراعظم بہت پڑھے لکھے ہیں اور باقی لوگ پڑھے لکھے نہیں ہیں۔ بھارت کے وزیراعظم کو یہ معلوم نہیں ہے کہ اس ملک کے شمال مشرق میں ایک ایسی ریاست ہے جہاں کریمنل پروسیجر ایکٹ لاگو نہیں ہوا ہے اور سی آر پی سی اب بھی لاگو نہیں ہے۔