اسد الدین اویسی کا کورونا ٹیسٹ

رکن پارلیمنٹ اسدالدین اویسی نے کہا کہ ٹیسٹ کروانا کوئی معیوب بات نہیں ہے، اگر کسی کی رپورٹ مثبت آتی ہے تواس کا بہتر علاج کیا جاسکتا ہے۔

حیدرآباد کے رکن پارلیمان اسدالدین اویسی نے ہفتے کے روز اپنا کورونا اور اینٹی جین ٹیسٹ کروایا۔

مجلس اتحادالمسلمین کے صدر اسدالدین اویسی نے عوام میں کورونا ٹیسٹ کرانے کی شعور بیداری کے طور پر آج صبح اپنے ٹیسٹ کروائے۔

پرانے شہر حیدرآباد چارمینار کے دامن میں واقع نظامیہ طبی ہسپتال کے ہیلتھ سنٹر سے رجوع ہوتے ہوئے بیرسٹر اویسی نے کورونا ٹسیٹ کروایا، اس کے بعد انھوں نے تالاب کٹہ اربن ہیلتھ سینٹر میں اینٹی جین ٹیسٹ کروایا۔جس میں ریپڈ اینٹی جین ٹیسٹ رپورٹ منفی آئی ہے جبکہ آر ٹی پی سی آر طریقہ سے بھی ٹیسٹ کروایا۔

سمجھا جاتا ہے کہ اس کی رپورٹ کل (اتوار) کو آئے گی ۔کیونکہ اس طریقہ کار کے ٹیسٹ رپورٹ موصول ہونے 24 تا 36 گھنٹے کا وقت لگتا ہے،جبکہ ریپڈ اینٹی جین ٹیسٹ رپورٹ کا 20 تا 30 منٹ کے اندر نتیجہ آتا ہے۔

ریپڈ اینٹی جین کی رپورٹ موصول ہونے کے بعد اسدالدین اویسی نے بتایا کہ اینٹی جین رپورٹ منفی آئی ہے- کورونا کی رپورٹ کل ملےگی- اس موقع پر بیرسٹر اسدالدین اویسی نے عوام سے اپیل کے اپنے قریبی ہیلتھ سنٹرز میں اینٹی جین اور کورونا کے ٹیسٹ کروائیں۔ انھوں نے کہا کہ ٹیسٹ کروانے میں کوئی معیوب بات نہیں ہے، اگر کسی کی رپورٹ مثبت آتی ہے تواس کا بہتر علاج کیا جاسکتا ہے۔

اس موقع پر اسد الدین اویسی نے مذکورہ اسپتال میں طبی سہولیات اور دیگر امور کا بھی جائزہ لیا۔

بتایا گیا کہ حیدرآباد شہر میں 30 مراکز قائم کیے گئے ہیں جہاں مذکورہ ٹیسٹ کیے جارہے ہیں۔