آندھراپردیش: ہونے والی دلہن کی ڈینگو سے موت

آندھراپردیش کے ضلع چتور میں ایسا سانحہ پیش آیا جس کے سبب اس کے اہلخانہ صدمے سے نڈھال ہیں ۔

ضلع چتور کے پالاسمدرم منڈل کے نرسمہاپورم پنچایت کی حدود میں واقع ٹی وی این آرپورم کے رہنے والے کرشنم راجو کی 18 سالہ دوسری بیٹی چندرکلا عرف کاویا کی شادی ہونے والی تھی جس کے لیے انتظامات کئے جارہے تھے تاہم اسی دوران کاویا کو ڈینگو ہوگیا۔

کاویا کو فوری طورپر تمل ناڈو کے شولنگھور سرکاری اسپتال میں داخل کروایا گیا جہاں سے اس کی حالت خراب ہونے پر ویلور کے ایک سرکاری اسپتال منتقل کیا گیا۔

شادی کے لیے کاویا کے رشتہ دار اور دیہاتی جمع ہوگئے جنہوں نے اسپتال سے کاویا کو شادی کے لیے لے جانے کی ڈاکٹرس سے درخواست کی تاہم کاویا کی حالت خراب ہونے پر ڈاکٹرس نے اس کی اجازت نہیں دی جس پر یہ شادی روک دی گئی۔

اسی دوران اسپتال میں کاویا کی حالت بگڑگئی اور اس کی موت ہوگئی جس کے بعد اس کے خاندان کے ساتھ ساتھ اس کے ہونے والے سسرالی رشتہ داروں میں غم کی لہر دوڑ گئی۔