حیدرآباد: آندھرا پردیش حکومت کو ایک بڑا جھٹکا دیتے ہوئے، ہائی کورٹ نے پولیس کی جانب سے مارگدرشی چٹ فنڈز کے بینک اکاؤنٹس کو منجمد کرنے کا مطالبہ کرتے ہوئے داخل کی گئی تمام نوٹسوں کو معطل کردیا۔ قبل ازیں، آندھرا پردیش پولیس نے مارگدرشی برانچ منیجرز کو نوٹس جاری کرتے ہوئے کہا تھا کہ وہ چرالہ، وشاکھا اور سیتم پیٹ برانچوں کے بینک اکاؤنٹس کو منجمد کردیں۔ اسی کو چیلنج کرتے ہوئے مینیجرز نے ہائی کورٹ کا رخ کیا۔ عدالت کی جانب سے انہیں فوری طور پر راحت فراہم کرتے ہوئے تمام نوٹسوں کو معطل کر دیا۔
ہائی کورٹ نے ایک اور حصص منتقلی معاملہ میں بھی مارگدرشی چٹ فنڈ پرائیویٹ لمیٹڈ کے چیئرمین راموجی راؤ اور منیجنگ ڈائرکٹر شیلجا کرن کو بھی راحت دی ہے جبکہ اس معاملہ میں جی یوری ریڈی نے جعلسازی کے ذریعہ حصص کی منتقلی کا الزام عائد کیا تھا۔ اس معاملہ میں عدالت نے ریاستی سی آئی ڈی کے دائرہ اختیار پر سخت اعتراض کئے اور ایک عبوری حکم جاری کرتے ہوئے، سی آئی ڈی کے ذریعے درج مقدمے کی مزید کارروائی کو 8 ہفتوں کے لیے معطل کر دیا۔