اکبر الدین اویسی کی پولیس انسپکٹر کو دھمکی

ریاست تلنگانہ میں اسمبلی انتخابات کے پیش نظر تمام سیاسی پارٹیوں کی انتخابی مہم تیزی سے جاری ہے۔ اسی دوران سیاسی رہنماؤں کی جانب سے متنازع بیانات کا سلسلہ بھی جاری ہے۔ MIM leader Akbaruddin Owaisi's election rally

حیدرآباد: آل انڈیا مجلس اتحاد المسلمین کے صدر اسد الدین اویسی کے بھائی اکبر الدین اویسی نے منگل کے روز ایک پولیس انسپکٹر کو کھلم کھلا دھمکی دی ہے جو اکبر الدین اویسی سے انتخابی ضابطہ اخلاق پر عمل کرنے کو کہہ رہا تھا۔ اکبرالدین اویسی نے پولیس اہلکار کو اس وقت دھمکی دی جب پولیس انسپکٹر نے اکبر الدین اویسی کو وقت زیادہ ہونے پر تقریر روکنے کو کہا۔ کیونکہ انتخابی ضابطہ اخلاق کے تحت مقررہ وقت سے تجاوز کرنا خلاف ورزی میں شامل ہوتا ہے۔

حیدرآباد کے للیتا باغ میں مجلس کے رہنما اکبر الدین اویسی ایک ریلی سے خطاب کر رہے تھے کہ اسی دوران پولیس اہلکار نے انہیں رک جانے کو کہا۔ جس پر اکبر الدین اویسی نے پولیس اہلکار سے کہا کہ وہ یہاں سے چلے جائے۔ اکبر الدین اویسی نے مزید کہا کہ "کیا آپ کو لگتا ہے کہ چھریوں اور گولیوں کا سامنا کرنے کے بعد میں کمزور ہو گیا ہوں، ابھی بھی مجھ میں بہت ہمت ہے، پانچ منٹ باقی ہیں اور میں پانچ منٹ تک خطاب کروں گا، مجھ کو کوئی نہیں روک سکتا، اگر میں اشارہ کردوں تو آپ کو دوڑنا پڑے گا''۔ اکبر نے مزید کہا کہ ''میں یہ کہہ رہا ہوں کہ سیاسی پارٹیاں ہمیں کمزور کرنے کے لیے اس طرح آتے ہیں''۔

مجلس کے رہنما اکبر الدین اویسی چندریان گٹہ حلقہ سے اسمبلی انتخابات کے امیدوار ہیں۔ یہ حلقہ مجلس کا گڑھ رہی ہے، پارٹی نے گزشتہ دو اسمبلی انتخابات یعنی سنہ 2014 اور سنہ 2018 میں اس حلقہ سے کامیابی حاصل کی تھی۔ ریاست تلنگانہ میں اس بار سہ رخی مقابلہ ہونے جارہا ہے۔ بی آر ایس، کانگریس اور بی جے پی تینوں ہی انتخابات میں کامیابی کا دعوی کررہی ہے۔ کانگریس کو کرناٹک کی طرح تلنگانہ میں بھی کامیابی کی قوی امید ہے۔

واضح رہے کہ تلنگانہ میں 30 نومبر کو ایک ہی مرحلے میں اسمبلی انتخابات ہوں گے۔ تلنگانہ سمیت دیگر چار ریاستوں میں اسمبلی انتخابات کے نتائج کا اعلان 3 دسمبر کو کیا جائے گا۔