حیدرآباد، دکن میں یوم عاشورہ کی جھلکیاں

ریاست تلنگانہ کے دارالحکومت حیدرآباد میں دس محرم کے موقع پر مختلف انداز سے یوم عاشورہ منایا جاتا ہے۔

بھارت کے تاریخی جنوبی شہر حیدرآباد میں محرم الحرام کے موقع پر نہایت ہی عقیدت و احترام سے یوم عاشورہ کا اہتمام کیا جاتا ہے۔

حیدرآباد میں بلا لحاظ مذہب و ملت عقیدت مند اپنے اپنے طریقے سے یوم عاشورہ کا اہتمام کرتے ہیں۔

یوم عاشورہ کے موقع پر شہر حیدرآباد میں سب سے اہم علؐم، بی بی کا علؐم کہلاتا ہے، جو دختر رسول سیدہ فاطمۃ الزہرا رضی اللہ عنہا کے نام سے موسوم ہے۔

یہ علم عاشور خانہ الاوۂ بی بی سے ہاتھی پر نکلتا ہے۔ تاریخی چارمینار اور دیگر کئی مقامات سے ہوتا ہوا چادر گھاٹ پر اس کا سفر ختم ہوتا ہے۔

اس علؐم میں نہ صرف مسلمان بلکہ برادران وطن بھی کثیر تعداد میں شریک ہوتے ہیں۔ ہندو بستیوں میں بھی علم ایستاد کئے جاتے ہیں اور عاشورہ کے روز تعزیے نکالے جاتے ہیں۔

اس دن پرانے شہر میں لنگر اور شربت کی سبیلیں بھی لگائی جاتی ہیں۔

اہل تشیع اس روز ماتم کرتے ہیں اور اہل بیت کی شہادت کا غم مناتے ہوئے علم نکالتے ہیں جبکہ دیگر مسلمان اس دن روزہ رکھتے ہیں۔ اور اللہ کو راضی کرنے کی کوشش کرتے ہیں۔ کیوں کہ اس دن کے روزے کی بڑی اہمیت و فضیلت بیان کی گئی ہے۔