'بہتر اسپورٹس پالیسی تیار کی جائے گی'

تلنگانہ کے وزیر کھیل کود سرینواس گوڑ نے کہا ہے کہ ریاست کی جلد ہی بہتر اسپورٹس کی پالیسی تیار کی جائے گی۔

ریاست میں کھیل کود کی ترقی کے نشانہ کے ساتھ وزیراعلی نے کابینی ذیلی کمیٹی قائم کی ہے۔ ریاست کی بہتر اسپورٹس کی پالیسی کے لئے اس سب کمیٹی کی جانب سے مشورے حاصل کئے جارہے ہیں۔ حیدرآباد کے گچی باولی ہاکی اسٹیڈیم میں قومی کھیل کے دن کی تقریب بڑے پیمانہ پر منعقد کی گئی جس میں وزیر کھیل کود سرینواس گوڑ نے مہمان خصوصی کے طور پر شرکت کی۔

اس موقع پر انہوں نے میجر دھیان چند کے مجسمہ پر پھول نچھاور کئے۔ انہوں نے کہاکہ دھیان چند دیہی علاقہ سے تعلق رکھتے تھے جنہوں نے اولمپکس میں نمایاں مظاہرہ کیا تھا۔

انہوں نے دھیان چند کو ایک بہترین کھلاڑی اور رول ماڈل قرار دیا۔ انہوں نے کہا کہ 45 اسٹیڈیمس کی تکمیل کی جائے گی۔ ہر حلقہ میں ایک اسٹیڈیم کی ضرورت ہے جس کے لئے ٹی آرایس حکومت کام کر رہی ہے۔ اس کے لئے منصوبہ تیار کیا جا رہا ہے۔