'آندھراپردیش میں ایک سال کے دوران 44 مندروں پر حملے'

آندھراپردیش میں مندروں پر مبینہ حملوں کے واقعات کی تحقیقات کے لیے 16 رکنی خصوصی تحقیقاتی ٹیم تشکیل دی گئی ہے۔

آندھراپردیش کے ڈی جی پی گوتم سوانگ نے بتایا کہ ’ریاست میں مندروں پر حملوں کے سلسلے میں 335 افراد کو گرفتار کیا گیا اور 175 معاملات کو حل کرلیا گیا۔ انہوں نے بتایا کہ گذشتہ ایک سال کے دوران 44 بڑی منادر پر حملے کئے گئے تھے جن میں سے 29 مقدمات کی جانچ مکمل کرلی گئی اور اس سلسلہ میں 85 ملزمین کو گرفتار کیا گیا۔

گوتم سوانگ نے کہا کہ ’آندھراپردیش میں مندروں کی حفاظت کےلیے 23 ہزار 256 گاؤں میں 15 ہزار 394 پولیس اہلکاروں کو تعینات کیا گیا اور اب تک 58 ہزار 871 مندروں کو جیوٹیگنگ سے منسلک کیا گیا ہے۔

انہوں نے بتایا کہ ریاست میں منادر کی حفاظت کے لیے 43 ہزار 824 سی سی ٹی وی کیمرے نصب کئے گئے اور مسلسل نگرانی کی جارہی ہے۔ انہوں نے کہا کہ منادر کی حفاظت اور اس سے متعلق تفصیلات کے لیے 9392903400 نمبر پر ربط قائم کیا جاسکتا ہے۔

وہیں، دوسری جانب ریاست میں مندروں پر مبینہ حملوں کی تحقیقات کے لیے ایک خصوصی ٹیم بھیتشکیل دی گئی۔ ایڈیشنل ڈائرکٹر اینٹی کرپشن بیورو جی وی اشوک کمار اس ٹیم کے سربراہ ہوں گے۔