تمل ناڈو کے گورنر بنواری لعل پروہت کا کورونا ٹسٹ مثبت آیا

تمل ناڈو کے گورنر بنواری لعل پروہت کا کورونا ٹسٹ مثبت آیا ہے۔ وہ 80 برس کے ہیں اور انہیں کاویری ہسپتال میں شریک کرایا گیا ہے۔

بنواری لعل پروہت کا کورونا ٹسٹ مثبت آنے کے بعد انہیں ہسپتال میں شریک کیا گیا تاہم ان کی حالت مستحکم ہے اور ان میں ابھی تک وبا کی کوئی بھی علامات ظاہر نہیں ہوئی ہیں۔

گورنر کے دفتر سے جاری بیان میں کہا گیا کہ 84 ملاقاتیوں میں سے کوئی بھی کورونا پازیٹیو نہیں ظاہر ہوا ہے۔ احتیاطی اقدام کے طور پر کیونکہ راج بھون عملے کے 38 ارکان کوویڈ19 ٹسٹ میں پازیٹیو پائے گئے جس کے بعد گورنر کو آرام کا مشورہ دیا گیا اور محکمہ صحت نے انہیں ہسپتال منتقل کردیا جہاں وہ زیرعلاج ہیں۔

بنواری لعل پروہت کو 30 ستمبر 2017 کو تمل ناڈو کا گورنر مقرر کیا گیا تھا۔ چینائی میں کورونا وائرس تیزی سے پھیل رہا ہے جبکہ صرف چینائی میں ہی کورونا سے متاثر ہونے والے افراد کی کل تعداد ایک لاکھ سے زائد ہوگئی ہے۔