Job for Cash Scam ای ڈی کے چھاپے کے بعد ڈی ایم کے وزیر سینتھل بالاجی کے سینے میں درد، اسپتال میں داخل

تمل ناڈو کے وزیر وی سینتھل بالاجی کو ای ڈی نے مبینہ منی لانڈرنگ کے ایک معاملے میں پوچھ گچھ کے لیے حراست میں لے لیا۔ اس دوران اچانک ان کی طبیعت مبینہ طور پر خراب ہو گئی جس کے بعد انہیں اسپتال میں داخل کرایا گیا جہاں ان کے حامی بھی جمع ہو گئے اور احتجاج کرنے لگے۔

چنئی: تمل ناڈو کے وزیر وی سینتھل بالاجی کو انفورسمنٹ ڈائریکٹوریٹ (ای ڈی) کے اہلکاروں نے مبینہ منی لانڈرنگ کے ایک معاملے میں علی الصبح پوچھ گچھ کے لیے حراست میں لے لیا تھا۔ اس دوران انہوں نے سینے میں درد کی شکایت کی۔ تفتیشی ایجنسی نے منگل کو ڈی ایم کے لیڈر سے ان کے احاطے میں چھاپہ مار کر پوچھ تاچھ کی۔ اس کے فوراً بعد ای ڈی نے بالاجی کو سخت حفاظتی انتظامات کے درمیان بدھ کی صبح طبی معائنہ کے لیے چنئی کے اوماندور سرکاری اسپتال منتقل کیا۔

ڈی ایم کے لیڈر کو اسپتال لے جانے کے بعد اسپتال کے باہر زبردست ہنگامہ دیکھنے میں آیا۔ ان کے حامی ای ڈی کی کارروائی کے خلاف احتجاج کرنے کے لیے اسپتال کے باہر جمع ہو گئے۔ اس دوران ریاستی وزیر کو کار میں پڑے ہوئے درد سے کراہتے ہوئے دیکھا جا سکتا ہے۔ ڈی ایم کے ایم پی اور وکیل این آر ایلانگو نے کہا کہ بالاجی کو اسپتال کے آئی سی یو میں منتقل کردیا گیا ہے۔ ای ڈی نے انہیں گرفتار کرنے کی تصدیق نہیں کی ہے۔

ایلانگو نے کہا، 'میں نے انہیں (سینتھل بالاجی) کو اس وقت دیکھا جب انہیں آئی سی یو میں منتقل کیا گیا تھا۔ ڈاکٹر ان کی صحت کا جائزہ لے رہے ہیں۔ جب کوئی شخص کہتا ہے کہ اس پر حملہ کیا گیا ہے تو ایسے میں ڈاکٹرز کو تمام زخموں کو نوٹ کرنے کی ضرورت ہے اور رپورٹ دیکھنے کے بعد پتہ چلے گا۔ ہمیں باضابطہ طور پر (ای ڈی کی طرف سے) مطلع نہیں کیا گیا ہے کہ انہیں گرفتار کیا گیا ہے۔

ڈی ایم کے کے وزیر ادھے ندھی اسٹالن نے کہا، ’’سینتھل بالاجی کا علاج چل رہا ہے‘‘۔ ہم اس معاملے میں قانونی طور پر نمٹیں گے۔ ہم بی جے پی کی زیر قیادت مرکزی حکومت کی دھمکی آمیز سیاست سے ڈرنے والے نہیں ہیں۔ ڈی ایم کے لیڈروں کا الزام ہے کہ جب ای ڈی کے اہلکار انہیں حراست میں لے کر جا رہے تھے تو اسی دوران بالاجی کو سینے میں درد کی شکایت ہوئی۔ انہوں نے مزید کہا کہ جب سنتھل بالاجی کو ای ڈی اسپتال لے گئی تو وہ ہوش میں نہیں دکھے۔

اس کے بعد کئی رہنما اور وزیر ان سے ملنے آئے۔ اس میں بنیادی طور پر کھیل اور نوجوانوں کی بہبود کے وزیر ادھے ندھی اسٹالن، وزیر صحت ایم سبرامنیم، وزیر ای وی ویلو، وزیر شیکھر بابو شامل تھے۔ ای ڈی حکام نے منگل کو کرور میں بالاجی کی رہائش گاہ اور ریاستی سکریٹریٹ میں واقع ان کے دفتر پر مبینہ منی لانڈرنگ کے ایک معاملے میں چھاپہ مارا۔ ای ڈی نے کرور میں اس کے بھائی اور ایک قریبی ساتھی کے گھر پر بھی چھاپہ مارا۔ وی سینتھل بالاجی ڈی ایم کے کی قیادت والی تمل ناڈو حکومت میں بجلی، اور آبکاری کے وزیر ہیں۔

(اے این آئی)