سپریم کورٹ نے تمل ناڈو حکومت سے رپورٹ طلب کی

سپریم کورٹ نے تمل ناڈو حکومت کو ہدایت دی ہے کہ وہ سابق وزیراعظم راجیو گاندھی کے قتل کے مجرموں کی معافی سے متعلق عرضی پر دو ہفتے کے اندر اسٹیٹس رپورٹ داخل کرے۔

جسٹس ایل ناگیشور راؤ کی صدارت والی بینچ نے تمل ناڈو حکومت کو ہدایت دی ہے کہ وہ دو ہفتے کے اندر اسٹیٹس رپورٹ داخل کرے کہ مجرموں کی جانب سے گورنر کے سامنے دفعہ 161 کے تحت سزا معاف کرنے کی داخل عرضی پر کیا اقدام کیا گیا ہے۔

مجرم اے جی پیراری ولن اور دیگر نے سنہ 2018 میں گورنر کے سامنے عرضی داخل کرکے سزا معاف کرنے کی درخواست کی تھی۔ بینچ نے ایک بار پھر مرکز کی رپورٹ پر سوال اٹھاتے ہوئے کہا کہ یہ واضح ہے کہ مرکزی جانچ بیورو(سی بی آئی) کی سابقہ دونوں رپورٹس ایک جیسی ہیں۔ اسی سے پتہ چلتا ہے کہ تفتیشی ایجنسی اس معاملے میں بڑے سازش کی تفتیش نہیں کرنا چاہتی۔ اس تفتیش میں کوئی پیش رفت نہیں ہوئی ہے۔

مرکزی حکومت کی جانب سے ایڈیشنل سالسٹر جنرل پنکی آنند نے کہا کہ بیرون ممالک سے لیٹر روگیٹری (ایل آر) کا جواب نہیں آیا ہے۔ سپریم کورٹ نے گذشتہ ہفتے منگل کے روز بھی بڑی سازش کی تفتیش کرنے والی ملٹی ڈسپلینری مانیٹرنگ اتھارٹی (ایم ڈی ایم اے) کی اسٹیٹس رپورٹ پر ناراضگی ظاہر کی تھی۔