چنئی: تمل ناڈو میں گزشتہ 24 گھنٹوں میں چھ مزید لوگوں کی موت کے ساتھ چنئی اور مضافاتی علاقوں میں گردابی طوفان میچونگ سے متعلق واقعات میں مرنے والوں کی تعداد بڑھ کر 17 ہو گئی ہے۔ پولیس کی جانب سے جاری کردہ ایک ریلیز میں کہا گیا ہے کہ مختلف واقعات میں آج چھ افراد کی موت ہوئی اور طوفان سے متاثرہ علاقوں سے 5000 سے زائد افراد کو محفوظ مقامات پر منتقل کر دیا گیا ہے۔
اس کے علاوہ اس عرصے کے دوران شہر بھر میں ڈوبنے اور بجلی کے جھٹکوں کے مختلف واقعات کے بعد مزید 10 افراد کو مختلف اسپتالوں میں داخل کرایا گیا۔ یہاں پانی جمع ہونے کی وجہ سے 12 سب وے مسلسل تیسرے دن بھی بند رہے۔ وہیں دوسری جانب وزیر اعظم نریندر مودی نے بدھ کو کہا کہ ان کی تعزیت ان لوگوں کے ساتھ ہے جنہوں نے اس قدرتی آفت میں اپنے پیاروں کو کھو دیا ہے۔ وزیر اعظم نے تمل ناڈو، آندھرا پردیش اور پڈوچیری میں طوفان سے متاثرہ تمام لوگوں کے لیے دعا بھی کی۔
وزیراعظم مودی نے ٹوئٹر پر ایک پوسٹ میں کہا کہ ان کی دعائیں زخمیوں یا متاثرین کے ساتھ ہیں۔ انہوں نے کہا کہ اہلکار متاثرہ لوگوں کی مدد کے لیے انتھک محنت کر رہے ہیں اور حالات مکمل طور پر معمول پر آنے تک اپنا کام جاری رکھیں گے۔ مودی نے کہا، ’’میری تعزیت ان لوگوں کے ساتھ ہے جنہوں نے سائیکلون میچونگ کی وجہ سے اپنے پیاروں کو کھو دیا ہے، خاص طور پر تمل ناڈو، آندھرا پردیش اور پڈوچیری میں، ہم متاثرہ لوگوں کی مدد کے لیے زمین پر انتھک کام کر رہے ہیں اور جب تک حالات مکمل طور پر نارمل نہیں ہو جاتے اپنا کام جاری رکھیں گے۔
لوک سبھا میں بدھ کو ڈی ایم کے کے سینئر رکن ٹی آر بالو نے تمل ناڈو اور راجدھانی چنئی میں شدید بارش اور تیز ہواؤں سے ہونے والی تباہی کے پیش نظر طوفان میچونگ کو قومی آفت قرار دینے کا مطالبہ کیا۔ بالو نے وقفہ صفر کے دوران کہا کہ طوفان کے قہر نے تمل ناڈو اور ریاستی دارالحکومت چنئی کے کئی علاقوں میں شدید بارش کی وجہ سے بہت زیادہ نقصان پہنچایا ہے۔
انہوں نے مرکزی حکومت سے مطالبہ کیا کہ وہ اسے قومی آفت قرار دے اور پورے تمل ناڈو کو اناج اور دیگر راحت فراہم کرے۔ انہوں نے یہ بھی مطالبہ کیا کہ پورے تمل ناڈو کو قومی آفت سے متاثر قرار دیا جائے۔ انہوں نے میچونگ طوفان سے ہونے والے نقصانات کا جائزہ لینے کے لیے ایک مرکزی ٹیم کو فوری طور پر تمل ناڈو بھیجے جانے کا بھی مطالبہ کیا۔ (یو این آئی مشمولات کے ساتھ)
