Self Help Groups In JK سیلف ہیلپ گروپس میں شامل ہزاروں نوجوان کو بے روزگار کر دیا گیا، محبوبہ مفتی

پی ڈی پی صدر محبوبہ مفتی نے ایل جی منوج سنہا سے سیلف ہیلپ گروپس مسئلے میں مداخلت کرکے اس سے حل کرنے کی اپیل کی۔

سرینگر:جموں وکشمیر کی سابق وزیر اعلی محبوبہ مفتی نے الزام عائد کیا ہے کہ سیلف ہیلپ گروپس سے وابستہ یوٹی کے ہزاروں تعلیم یافتہ نوجوانوں کو بے روزگار کردیا گیا ہے۔

ہفتے کو محبوبہ مفتی نے سماجی رابطہ سائٹ "ایکس" پر ایک پوسٹ میں ایل جی منوج سنہا سے اس معاملے میں مداخلت کرنے کی اپیل کی۔ انہوں نے پوسٹ میں لکھا کہ اس اسکیم کے شروع ہونے کے بعد سے ہی سیلف ہیلپ گروپس سے وابستہ جموں وکشمیر کے ہزاروں بے روزگار ہوچکے ہیں۔انہوں نے مزید کہا کہ" سال 2020 میں تشکیل دی گئی فیکٹ فائنڈنگ کمیٹی نے ابھی تک اپنے نتائج ظاہر نہیں کیے ہیں۔ان روشن ہنر مند ڈگری یافتہ نوجوانوں کو روزگار سے محروم رکھا جارہا ہے۔ایسے میں ضرورت ہے کہ انتظامیہ اس مسئلے پر اپنی توجہ مرکوز کریں۔"

قابل ذکر ہے کہ جموں وکشمیر میں تعلیم یافتہ نوجوانوں کو فائدہ مند روزگار فراہم کرنے کی خاطر سیلف ہیلپ گروپس بنائے گئے تھے، کیونکہ یہاں کے تعلیم یافتہ بے روزگار نوجوان کی بڑھتی ہوئی تعداد کے مقابلے یوٹی میں سرکاری ملازمتیں بہت کم ہیں۔وہیں ملک کی اہم صنعتی منڈیوں سے دوری اور برقی توانائی کی کمی ہمیشہ جموں وکشمیر میں قائم ہونے والی بڑی صنعتوں کے لیے اہم رکاوٹ رہی ہے۔