ورچول کلاسز کی نئی ہدایات پر سختی سے عمل در آمد کیا جائے

جموں وکشمیر انتظامیہ نے کشمیر کے تمام سرکاری و نجی اسکولوں کو ورچول کلاسز کی نئی ہدایات پرسختی سے عمل کرنے پر زور دیا ہے۔

اس ضمن میں اسکولی تعلیم محکمہ نے جمعہ کے روز کشمیر کے تمام چیف ایجوکیشن افسران کو حکم دیا یے کہ وہ ضلع میں تمام سرکاری اور نجی اسکولوں کے آن لائن کلاسز کے لئے جاری کردہ نئی ہدایات پر عمل در آمد کرائیں۔

وہیں اسکولی تعلیم کے پرنسپل سیکرٹری نے کشمیر صوبے کے سی ای اوز سے کہا ہے کہ 'وہ اس بات کو یقینی بنائیں کہ تمام اسکولوں کے سربراہان آن لائن کلاسز کی خاطر جاری کردہ نئے رہنما اصولوں پر من و عن عمل پیرا رہیں'۔ ورچول کلاسز کے نئے ہدایات کی پاسدار عمل میں لانے کے لیے انتظامیہ نے ایک ایکشن ٹیکن رپورٹ بھی طلب کی ہے، جو کہ ہفتہ وار بنیاد پر پیش کی جائے گی۔

واضح رہے کہ حال ہی میں جموں وکشمیر انتظامیہ کی ہدایت پر اسکولی تعلیم نے پری پرائمری اور پرائمری کے آن لائن کلاسوں کے لئے نئے رہمنا خطوط جاری کیے ہیں، جس کے تحت پری پرائمری اور پرائمری کے بچوں کو آن لائن موڈ کے ذریعے روزانہ 30 اور 90 منٹ تک پڑھانے کا ہی وقت مقرر کیا گیا ہے۔جبکہ آٹھویں جماعت کے طلبہ کے لئے 30 سے 45 منٹ کے اب 2 سیشن ہی طے کیے گیے ہیں۔