کورونا کا ٹیکہ لگانے والے بشیر احمد کے ساتھ خاص گفتگو

عالمی وبا کورونا وائرس کیس کی پہلی تصدیق ہونے کے قریب ایک سال بعد جموں و کشمیر میں بھی دیگر ریاستوں کی طرح فرنٹ لائن پر کام کر رہے افراد کو کورونا ویکسین لگائی جا رہی ہے۔

دیگر ریاستوں کی طرح جموں و کشمیر میں بھی کورونا ٹیکہ کاری کا باضابطہ آغاز کیا گیا۔ اس سلسلے میں گرمائی دارالحکومت سرینگر کے صورہ میڈیکل انسٹی ٹیوٹ (SKIMS) میں پہلا ٹیکہ ڈائریکٹر اے جی آہنگر کو لگایا گیا۔

ڈائریکٹر کے بعد پہلا ٹیکہ لگانے والے ہیلتھ ورکر بشیر احمد نے ای ٹی وی بھارت کے ساتھ بات کرتے ہوئے کہا کہ ٹیکہ لگانے کے بعد وہ بے حد خوش ہیں۔

بشیر احمد نے کہا کہ ٹیکہ لگانے کے بعد انہیں کسی قسم کی پریشانی کا سامنا نہیں ہوا۔ انہوں نے عوام سے افواہوں پر کان نہ دھرنے کی اپیل کرتے ہوئے کہا کہ ’’کورونا ویکسین بالکل محفوظ ہے۔‘‘

انہوں نے مزید کہا کہ کورونا ٹیکہ لگانے کے بعد وہ بالکل تندرست ہیں، انہیں کسی قسم کی کمزوری یا پریشانی کا سامنا نہیں کرنا پڑا۔

قابل ذکر ہے کہ یہ ویکسین پہلے ہیلتھ کیئر ورکرز، فرنٹ لائن ورکرز اور 50 سال سے زیادہ عمر والے لوگوں کو لگائی جائے گی۔

جموں و کشمیر میں عالمی وبا کورونا وائرس کے سبب اب تک ایک لاکھ بیس ہزار سے زائد افراد متاثر ہو چکے ہیں وہیں اس مہلک وبا کے سبب قریب دو ہزار افراد فوت ہو چکے ہیں۔