جموں وکشمیر عوامی مجلس عمل نے شہر سرینگر کے مختلف علاقوں میں بھیانک آتشزدگی کے نتیجے میں متعدد رہائشی مکانات کے نذر آتش ہونے اور لاکھوں کی املاک جل کر خاکستر ہونے پر تشویش کا اظہار کیا ہے۔
اپنے ایک بیان میں مجلس عمل نے شہر خاص کے گنجان آبادی والے علاقوں: تاربل، نواکدل، واتل کدل اور صفا کدل میں گزشتہ دنوں آگ کی ہولناک وارداتوں میں درجنوں مکانات کے نذر آتش ہونے پر متاثرین کے ساتھ ہمدردی اور یکجہتی کا اظہار کیا ہے۔
انہوں نے علاقے کے صاحب ثروت لوگوں خاص طور سے فلاحی اور امدادی انجمنوں سے اپیل کی ہے کہ وہ چلہ کلان کے ان سخت ترین ایام میں متاثرین کی ہر ممکن مدد اور باز آباد کاری کے لئے آگے آئیں تاکہ مشکلات اور مصیبت کی اس گھڑی میں ان کی کسی حد تک امداد کی جا سکے۔
خیال رہے گزشتہ دنوں شہر خاص کے سیکہ ڈافر اور نواکدل علاقوں میں آتشزدگی کے واقعات میں نصف درجن سے زیادہ رہائشی مکانات کو نقصان پہنچا اور لاکھوں روپے کی گھریلوں اشیاء راکھ کے ڈھیر میں تبدیل ہوگئی ہیں۔ جبکہ آگ بجھانے کے دوران فائر اینڈ ایمرجنسی سروسز کا ایک سب انسپکٹر بھی زخمی ہوگیا۔