سری نگر- جموں قومی شاہراہ پر بدھ کے روز ٹریفک معطل رہے گا: ٹریفک پولیس

سری نگر- جموں قومی شاہراہ مرمتی کام کے پیش نظر بدھ کے روز ٹریفک کی نقل و حمل کے لئے بند رہے گی۔ تاہم جنوبی کشمیر کو صوبہ جموں کے راجوری اور پونچھ اضلاع کے ساتھ جوڑنے والے تاریخی مغل روڈ اور سری نگر – لیہہ شاہراہ پر ٹریفک کی نقل و حمل حسب معمول جاری رہے گی۔ historic Mughal Road and the Srinagar-Leh highway

سرینگر:وادی کشمیر کو ملک کے باقی حصوں کے ساتھ جوڑنے والی سری نگر- جموں قومی شاہراہ مرمتی کام کے پیش نظر بدھ کے روز ٹریفک کی نقل و حمل کے لئے بند رہے گی۔ جموں وکشمیر ٹریفک پولیس نے بتایا کہ سری نگر – جموں قومی شاہراہ پر بدھ کے روز ناشری سے نویوگ ٹنل کے درمیان ٹریفک کی نقل و حمل معطل رہے گی۔ انہوں نے کہا کہ قومی شاہراہ پر صبح کے 9 بجے سے کسی بھی گاڑی کو قاضی گنڈ سے جموں جانے کی اجازت نہیں ہوگی اور عوام کے تحفظ کے لئے ناشری ویاڈکٹ پر گرڈر لگانے کے پیش نظر کسی بھی گاڑی کو دس بجے سے اودھم پور سے سری نگر جانے کی اجازت نہیں دی جائے گی۔ تاہم جنوبی کشمیر کو صوبہ جموں کے راجوری اور پونچھ اضلاع کے ساتھ جوڑنے والے تاریخی مغل روڈ اور سری نگر – لیہہ شاہراہ پر ٹریفک کی نقل و حمل حسب معمول جاری رہے گی۔

واضح رہے گزشتہ مہینے (اکتوبر 2023) کو ضلع رامبن کے شیری بی بی علاقے میں قومی شاہراہ 44 پر 224 میٹر طویل وائڈکٹ مکمل ہو گیا تھا۔ سڑک نقل و حمل اور شاہراہوں کے مرکزی وزیر نتن گڈکری نے سوشل میڈیا ایکس پر اس کی جانکاری پوسٹ کی تھی۔انہوں نے ایکس پر ایک پوسٹ کرتے ہوئے کہا کہ جموں وکشمیر میں شیربی بی میں 12 کروڑ روپے کی تخمینہ لاگت سے 224 میٹر سیگمنٹ (2-لین) کی تعمیر کا کام کامیابی سے مکمل ہوچکا ہے۔

وزیر موصوف نے کہا کہ اس پروجیکٹ کے مکمل ہونے سے خطے کی اقتصادی ترقی میں تعاون ملے گا اور اس علاقہ کی مجموعی کنکٹیوٹی میں اضافہ ہوگا۔