وادی کشمیر کو ملک وبیرون ملک کے ساتھ جوڑنے والی سرینگر۔جموں قومی شاہراہ ٹریفک کی آمد رفت کے لیے بند کر دی گئی ہے۔
اطلاعات کے مطابق جموں و کشمیر کے بالائی علاقوں میں تازہ برفباری کا سلسلہ شروع ہوا ہے اور قومی شاہراہ رام بن اور بانہال میں تازہ چٹانیں کھسک آنے کی وجہ سے ٹریفک کے لیے بند کر دی گئی ہے۔ ادھر شمالی اضلاع کے علاوہ سرینگر میں آج صبح ہلکی برفباری ہوئی۔
وادی میں چلہ کلان کے اپنے 40 روزہ دور اقتدار کے آخری مرحلے میں داخل ہونے کے بیچ گزشتہ روز موسم خشک اور دن میں ہلکی دھوپ بھی کھلی رہی تھی۔
گزشتہ روز محکمہ موسمیات کے ایک ترجمان نے وادی، پیر پنچال اور چناب کے علاقوں میں پیر کی شام سے ہی برف وباراں کے ایک اور مرحلے کی پیش گوئی کرتے ہوئے کہا تھا کہ وادی میں 21 جنوری یعنی منگل کے روز درمیانی سے بھاری درجے کی برف باری جبکہ 22 جنوری سے 26 جنوری تک موسم مجموعی طور پر خشک رہنے کی پیش گوئی کی تھی۔