SMC to Collect Sacrificial Animal Skin قربانی کے ایام میں ایس ایم سی کھالیں جمع کرے گی

ایس ایم سی مئیر نے شہریوں سے سڑکوں کے کنارے یا ندی نالوں میں کھالیں نہ پھیکنے کی گزارش کرتے ہوئے کہا ہے کہ سرینگر میں گاڑیوں کے ذریعے قربانی کے جانوروں کی کھالوں کو جمع کرکے ٹھکانے لگایا جائے گا۔ SMC Vehicles on Duty during Eid al Adha

سرینگر (جموں و کشمیر) :عید الاضحی کے ایام میں قربانی کے جانوروں کی کھال کو معقول طور سے ٹھکانے لگانے کے لئے سرینگر میونسپل کارپوریشن نے شہر میں 104 گاڑیوں کو قربانی کے جانوروں کی کھال وغیرہ جمع کرنے کے لیے مستعد رکھنے کا فیصلہ کیا ہے۔ سرینگر مونسپل کارپوریشن (ایس ایم سی) کے میئر جنید متو نے ایس ایم سی دفتر میں منعقدہ پریس کانفرنس کے دوران کہا کہ ’’شہروں کو ان گاڑیوں کا استعمال کرنا چاہئے تاکہ سڑکوں کے کنارے یا ندی نالوں میں کھالوں اور ہڈیوں کو نہ پھینکا جائے۔‘‘ یاد رہے کہ بر صغیر کے ساتھ ساتھ جموں کشمیر میں بھی 29 جون یعنی جمعرات کو عیدالاضحی منائی جائے گی۔

ایس ایم سی میئر نے کہا کہ ’’جو شہری کھالوں کو سڑکوں اور ندی نالوں میں پھینکے گا اس کے خلاف قانونی کارروائی انجام دی جائے گی۔ ‘‘ غور طلب ہے کہ گزشتہ برس عید الاضحی کے ایام میں ایس ایم سی نے قربانی کے جانوروں کی کھال اور ہڈیوں کو ٹھکانے لگانے کے لئے شہر میں کوئی سہولت دستیاب نہیں رکھی تھی جس کے باعث شہری سڑکوں کے کناروں اور ندی نالوں پر کھال وغیرہ پھینکنے پر مجبور ہوئے تھے۔ اس وقت ایس ایم سی کی کافی تنقید کی گئی تھی۔ تاہم ایس ایم سی نے رواں برس گاڑیاں دستیاب رکھنے کا فیصلہ کیا ہے جن کے ذریعے شہر کے ہر وارڈ میں گھر گھر جاکر ان کھالوں کو جمع کیا جائے گا۔

جنید متو نے بتایا کہ ’’ایس ایم سی نے گاڑیوں کے ڈرائیورز کے نمبرات مقامی اخباروں میں شائع کئے ہیں جن پر لوگ ان سے رابطہ کر سکتے ہیں اور اپنے وارڈ کی صفائی کو یقینی بنائیں گے۔‘‘ ڈل جھیل میں گاڑی نہ پہنچنے کے پیش نظر جنید متو نے کہا کہ ’’جھیل میں آباد بستیوں کو صاف رکھنے کے لئے شکارہ کا استعمال ہوگا جس سے کھال وغیرہ وہاں سے لاکر گاڑیوں میں لدی جائیں گی۔‘‘

جنید متو نے مزید بتایا کہ شہر میں پینے کا پانی دستیاب رکھنے کے لئے انہوں محکمہ جل شکتی اور متعلقہ افسران کے ساتھ جائزہ لیا ہے اور شہر میں پانی کے ٹینکر دستیاب رکھنے کی ہدایات دی گئی ہے۔ انہوں نے مزید کہا کہ ایل جی منوج سنہا سے انہوں نے گزارش کی ہے کہ گاندربل میں پن بجلی پروجیکٹ کو کچھ ہفتوں کے لئے بند کیا جائے تاکہ شہر میں پانی کی معقول سپلائی دستیاب رہے۔

واضح رہے کہ شہر سرینگر کو ضلع گاندربل سے پینے کا پانی سپلائی کیا جاتا ہے جو اسی ضلع میں واقع رنگوئل واٹر سپلائی اسکیم میں فلٹر ہوکر شہر میں پہنچایا جاتا ہے۔ جنید متو نے کہا کہ گاندربل پن بجلی پروجیکٹ اگر کچھ ہفتوں کے لئے بند کیا جائے گا تو شہر میں پانی کی سپلائی میں اضافہ ہوگا۔ ایس ایم سی مئیر نے مزید کہا کہ شہر میں بیشتر سڑکوں کی مرمت کی جا چکی ہے اور جن سڑکوں میں گڑھے موجود ہیں انکی مرمت کا سلسلہ جاری ہے۔