سرینگر کے صورہ اور نوشہرہ علاقوں میں ادویہ فروشوں کی 12 دکانوں کو سر بمہر کیا گیا۔ ادویہ دکانوں کے مالکان اور سیلزمینوں کے کورونا وائرس کی ویکسین نہ لگانے کی پاداش میں اس طرح کی کارروائی عمل میں لائی گئی ہے۔
تحصیلدار عیدگاہ کی قیادت میں ایک ٹیم نے خصوصی مہم کے تحت کیمسٹ کی دکانوں کے مالکان اور سیلزمینوں کی کووڈ 19 مخالف ویکسین خوراک لینے کی جانچ کی گئی۔ اس دوران ٹیم نے پایا کہ 12 ادویہ کی دکانوں کے مالکان اور ان میں کام کر رہے ملازمین نے اب تک کورونا مخالف ٹیکے نہیں لگوائے ہیں جس کے بعد ان دکانوں کو سیل کیا گیا۔
وہیں کورونا وائرس سے متعلق معیاری عملیاتی طریقہ کار یعنی ایس او پیز کی خلاف ورزی کرنے پر جرمانہ بھی وصول کیا گیا۔
تحصیلدار کے مطابق کورونا ویکسین لینے کے بغیر کسی بھی ادویہ کی دکان کو کام کرنے کی اجازت نہیں دی جائے گی جبکہ اس مہم کو آنے والے دنوں میں بھی جاری رکھا جائے گا اور اس بات کو یقینی بنایا جائے گا کہ کورونا کے رہنما خطوط پر من و عن عمل درآمد کیا جا رہا ہے یا نہیں۔
خیال رہے کہ جموں و کشمیر میں گزشتہ 24 گھنٹوں کے دوران عالمی وبا کورونا وائرس کے 1895 نئےمعاملات سامنے آئے ہیں جن میں سے 1262 کا تعلق کشمیر صوبے سے اور 633 کا جموں صوبے سے ہیں۔ وہیں اس مدت کے دوران 32 مریضوں کی موت بھی واقع ہوئی ہے۔
