Frisking In Lal Chowk Srinagar لال چوک اور گردنواح میں راہگیروں اور مسافروں کی جامہ تلاشیاں

سکیورٹی فورسز نے منگل کے روز سرینگر کے لالچوک اور گردنواح میں راہگیروں اور مسافروں کی جامہ تلاشیاں کی۔ اس دوران راہگیروں کے شناختی کارڈ باریک بینی سے چیک کئے جارہے تھے۔

سرینگر: جموں وکشمیر کی گرمائی دارالحکومت سرینگر کے لالچوک میں منگل کے روز سکیورٹی فورسز نے راہگیروں، موٹر سائیکل سواروں کی تلاشی لی جس دوران ان کے شناختی کارڈ باریک بینی سے چیک کئے جارہے تھے۔معلوم ہوا ہے کہ لالچوک اور اس کے گرد نواح میں سیکورٹی کو اچانک متحرک کیا گیا۔اطلاعات کے مطابق سماج دشمن عناصر کے منصوبوں کو ناکام بنانے کی خاطر شہر سرینگر میں سکیورٹی انتظامات کو مزید سخت کردیا گیا ہے۔سٹی رپورٹر نے بتایا کہ لالچوک میں منگل کے روز سکیورٹی فورسز نے مسافروں ، راہگیروں اور سکوٹی سواروں کو روک کر ان کی باریک بینی سے تلاشی لی ۔

انہوں نے بتایا کہ خواتین اور دوشیزاوں کے بھی شناختی کارڈ چیک کئے جارہے تھے۔ان کے مطابق راہگیروں کے شناختی کارڈوں کے ساتھ ساتھ ان کے موبائیل فون بھی چیک کئے جارہے تھے۔انہوں نے بتایا کہ سیکورٹی فورس اہلکار گاڑیوں بالخصوص دو پہیہ موٹر گاڑیوں (موٹر سائیکلوں) کی تلاشی لے رہے ہیں۔ اس کے علاوہ ان میں سوار افراد کے شناختی کارڈ چیک کئے جارہے ہیں۔

واضح رہے کہگزشتہ روز سکیورٹی فورسز نے ضلع سانبہ میں تلاشی کارروائی کے دوران ایک پیکٹ برآمد کیا ہے۔ سرکاری ذرائع نے بتایا کہ خدشہ ہے کہ یہ پیکٹ بین الاقوامی سرحد کے پار سے ڈرون کے ذریعے گرایا گیا ہے۔ جموں و کشمیر پولیس نے پیکٹ سے ہتھیار برآمد کرنے کا دعویٰ کیا ہے۔پولیس ذرائع نے بتایا کہ یہ پیکٹ پیر کی علی الصبح رکھ بڑوٹیا میں ریلوے لائن کے قریب سے ملا ہے۔ پیکٹ ملنے کے بعد علاقے کو محاصرے میں لے لیا گیا اور بم ڈسپوزل اسکواڈ کو طلب کیا گیا۔ وہیں اس معاملے سے متعلق پولیس نے دعویٰ کیا ہے کہ اس پیکٹ سے 3 پستول، 4 دستی بم، 6 میگزین اور 48 گولیاں برآمد ہوئے ہیں۔

(یو این آ ئی)