فوج کی جانب سے جوانوں کا زد و کوب کے بعد سرینگر میں احتجاج

سرینگر کے راولپورہ علاقے میں تعینات فوجی جوانوں کی جانب سے مقامی نوجوانوں کی مبینہ طور پر مار پیٹ کے بعد علاقے میں احتجاج کر رہے لوگوں نے ملوث فوجیوں کے خلاف کارروائی کا مطالبہ کیا ہے۔

سرینگر کے مضافاتی علاقہ راولپورہ میں فوج کی جانب سے دو مقامی نوجوانوں کی مبینہ طور پر مار پیٹ کے بعد لوگوں نے احتجاج کیا۔

واقعے کے بعد راولپورہ کی عوام نے علاقے کے داخلی و خارجی راستوں پر جگہ جگہ رکاوٹیں کھڑی کر دی ہیں۔

مقامی باشندوں کے مطابق دو مقامی نوجوانوں - شاہد احد بٹ اور عاقب اشرف ڈار - کی راولپورہ پل پر تعینات فوجیوں نے بلا اشتعال مار پیٹ کی۔ انہوں نے کہا: ’’ہم فوجیوں کی جانب سے ہمارے بچوں کی بلا جواز مار پیٹ کرنے پر احتجاج کر رہے ہیں، ہم ملوث فوجیوں کے خلاف کارروائی کا مطالبہ کر رہے ہیں۔‘‘

مقامی باشندوں کے مطابق عاقب کے پیر اور ٹانگ میں شدید چوٹ آئی ہے، جبکہ شاہد بھی بری طرح زخمی ہے۔ ’’دونوں کو علاج و معالجے کے لیے اسپتال منتقل کر دیا گیا ہے۔‘‘

دفاعی ترجمان راجیش کالیا نے کہا ہے کہ وہ اس معاملے میں تفصیلات حاصل کر رہے ہیں۔