منوج سنہا اور دگ وجے سنگھ کے بیان پر رہنماؤں کا ردعمل

جموں و کشمیر کے لیفٹیٹینٹ گورنر منوج سنہا کے اس بیان پر کہ 'افواہیں بے بنیاد ہیں' اور دگوجے سنگھ کے بیان 'اگر کانگریس اقتدار میں آتی ہے تو دفعہ 370 کی بحالی کے بارے میں سوچے گی'۔ پر سیاسی رہنماؤں نے ردعمل ظاہر کیا ہے۔

جموں و کشمیر کے لیفیننٹ گورنر منوج سنہا اور کانگریس کے سینئر رہنما دگوجے سنگھ نے گزشتہ روز کشمیر کے حوالہ سے اہم بیانات جاری کیے۔ جہاں سنہا کا کہنا تھا کہ 'افواہیں بے بنیاد ہیں' وہیں سنگھ کا دعویٰ تھا کہ 'اگر کانگریس اقتدار میں آتی ہے تو دفعہ 370 کی بحالی کے بارے میں سوچے گی'۔ ان بیانات پر وادی کے سیاسی لیڈران نے ملا جلا ردعمل ظاہر کیا ہے۔

رکن پارلیمان اور نیشنل کانفرنس کے سینئر لیڈر حسنین مسعودی کا کہنا تھا کہ 'ہم اُمید کرتے ہیں کہ اب کی بار یہ يقین دہانی سچ ثابت ہوگی۔ میں اب کی بار کیوں کہہ رہا ہوں؟ کیونکہ بالکل ایسی ہی یقین دہانی ہر سطح پر کی گئی تھی۔ چار اگست 2019 سے پہلے۔ ہم کو یاد ہے ہم وزیر اعظم سے ملے، گورنر سے ملے اور اُن سے گزارش کی کہ جموں و کشمیر کے ساتھ کھلواڑ نہ کریں۔ ہر ایک نے یقین دہانی کی لیکن پھر کیا ہوا آپ سب بہتر جانتے ہیں۔ ہمارے اندیشے سچ ثابت ہوئے۔'

مسعودی نے کہا کہ 'آج کا ہی واقعہ آپ دیکھو، سوپور میں پانچ جانیں گئیں۔ سنہا صاحب کی شخصیت کو دیکھ کر ہم اُمید کرتے ہیں کہ اس بار جو یقین دہانی کی جا رہی ہیں وہ سچ ثابت ہوںگی اور افواہیں غلط۔'

کانگریس لیڈر دگ وجے سنگھ کے بیان پر اپنا ردعمل ظاہر کرتے ہوئے اُنہوں نے کہا کہ 'اُنہوں نے غلط کیا بولا؟ سنہ 1975 کا ریکارڈ کیا کہتا ہے؟ وہ یقین دہانی کرتا ہے کہ بھارت اور جموں و کشمیر کے درمیان رشتے پر دفعہ 370 حاوی رہے گا۔ دگوجے جی نے اسی ریکارڈ کی ترجمانی کی ہے۔ دفعہ 370 کو بنانے والے نے ضمانت دی تھی کی پارلیمنٹ کو اس قانون میں ترمیم کرنے کی اجازت بھی نہیں ہوگی۔'

اُن کا مزید کہنا تھا کہ 'پارلیمنٹ میں پانچ اگست 2019 کو لیا گیا فیصلہ واپس لیا جائے۔ اس پر خود احتسابی کرے اور دیکھیے نتائج کیا نکلے ہیں اس فیصلے کے۔ ہر دروازہ کھلا ہے پر ضرورت اس بات کی ہے کہ وہ خود احتساب کر کے دیکھیں کہ کیا حاصل ہوا۔'

وہیں کمیونسٹ پارٹی آف انڈیا کے لیڈر یوسف تاریگامی نے کہا کہ 'ہم لیفٹینینٹ گورنر کے بیان کا خیر مقدم کرتے ہیں لیکن اگر وہ سنجیدگی اور ذمہ داری سے بول رہے ہیں۔ اس سے زیادہ میں کچھ نہیں بولنا چاہتا۔'

وہیں پیپلز ڈیموکریٹک پارٹی (پی ڈی پی) کے سینئر لیڈر رؤف بھٹ کا کہنا ہے کہ 'پانچ اگست 2019 کے بعد یہاں جو کچھ بھی ہوا وہ غیر قانونی ہوا۔ لوگ پریشان ہیں'۔

اُن کا مزید کہنا تھا کہ 'یہ صحیح وقت ہے جموں و کشمیر کو ریاست کا درجہ واپس دینے کے ساتھ ساتھ پانچ اگست سے پہلے کی صورتِحال بحال کریں۔'