سرینگر: یوم آزادی کی تقریب سے قبل ڈرون کیمروں کا ٹرائل رن

سرینگر میں یوم آزادی کے موقع پر فضائی نگرانی کے لیے ڈرون کیمروں کا استعمال کیا جائے گا۔

یوم آزادی اور یوم جمہوریہ کے پیش نظر جموں و کشمیر میں سیکورٹی کے سخت انتظامات کیے جاتے ہیں۔ حفاظتی اہلکاروں نے اس مرتبہ یوم آزادی کی تقریب کے دوران شیر کشمیر کرکٹ اسٹیڈیم، سرینگر اور اس کے گرد و نواح میں فضائی نگرانی کے لیے ڈرون کیمروں کے استعمال کا فیصلہ کیا ہے۔

اس ضمن میں جمعرات کو حفاظتی اہلکاروں نے سرینگر میں فضائی نگرانی کے لیے ڈرون کیمروں کے ٹرائل رن کے دوران کہا کہ 15 اگست یوم آزادی کی تقریب کے دوران اسٹیڈیم کے گرد و نواح میں تقریباً دو کلومیٹر کے علاقے کی نگرانی کے لیے 12 ڈرون کیمروں کا استعمال کیا جائے گا۔

واضح رہے کہ گزشتہ روز جموں و کشمیر پولیس کے سربراہ دلباغ سنگھ نے پہاڑی ضلع کشتواڑ میں سیکورٹی صورتحال کا جائزہ لینے کے بعد میڈیا کو بتایا تھا کہ پاکستان اور اس کے حامی جموں و کشمیر میں ایک بڑا حملہ کرنے کی تاک میں ہیں۔

15اگست سے قبل سرینگر سمیت جموں و کشمیر کے بیشتر اضلاع میں سیکورٹی انتظامات میں اضافہ کیا گیا ہے۔ راہگیروں اور گاڑیوں کی تلاشی کا سلسلہ بھی جاری ہے۔