نو مطلوب عسکریت پسندوں کی فہرست جاری

سرینگر میں گزشتہ مہینوں سے عسکریت پسندوں نے سرگرمی دکھائی ہے اور چند حملہ آور کاروائیاں بھی کی۔

جموں وکشمیر پولیس نے دارالحکومت سرینگر میں سرگرم اور مطلوب نو عسکریت پسندوں کی فہرست جاری کرتے ہوئے کہا کہ 'جو شخص ان کے متعلق جانکاری فراہم کرے گا اس کو انعام سے نوازا جائے گا'۔

ان عسکریت پسندوں میں دیرینہ مدت سے سرگرم جنوبی کشمیر کے کولگام ضلع کے عباس شیخ اور بڈگام کے محمد یوسف کانٹرو بھی شامل ہے۔

دیگر آٹھ عسکریت پسندوں میں سرینگر کے سات کا نام اس فہرست میں ہے اور انہوں نے حالیہ مہینوں میں عسکری راہ اختیار کی ہے۔

سرینگر سے تعلق رکھنے والوں میں وسیم قادر (نوگام)، شاہد خورشید (متھن)، عرفان صوفی (نٹی پورہ)، بلال احمد بھٹ (نٹی پورہ)، ثاقب منظور ڈار (برزلہ)، ابرار ندیم بھٹ (عیدگاہ) اور عبید شفیع ڈار (بٹہ مالو) شامل ہیں۔

قابل ذکر ہے کہ سرینگر میں گزشتہ مہینوں سے عسکریت پسندوں نے سرگرمی دکھائی ہے اور چند حملہ آور کاروائیاں بھی کی، جن میں سونار ستیاپال نسچل اور کرشنا ڈھابہ کے مالک آکاش مہرا، باغات برزلہ میں دو پولیس اہلکاروں اور نٹی پورہ میں پی ڈی پی لیڈر پرویز احمد کی حفاظت پر مامور پولیس اہلکار کی ہلاکت شامل ہیں۔

گزشتہ دنوں انسپکٹر جنرل آف پولیس کشمیر زون وجے کمار نے پریس کانفرنس میں کہا تھا کہ پولیس کو خفیہ اطلاع ملی تھی کہ عسکریت پسند کمانڈر عباس شیخ سرینگر کے چھانہ پورہ میں چپھے ہوئے ہیں جس کے بعد اس علاقے میں تلاشی کاروائی کی گئی تھی۔