نئی دہلی: وزیراعظم نریندرمودی نے پلوامہ کے شہیدوں کو خراج عقیدت پیش کیا ہے۔ وزیراعظم نے ٹوئیٹ کرتے ہوئے کہا کہ ہم اپنے ان بہادر جانبازوں کو یاد کرتے ہیں جنہیں ہم نے اس دن پلوامہ میں کھو دیا تھا۔ ہم ان کی عظیم قربانی کو کبھی فراموش نہیں کریں گے۔ ان کی ہمت ہمیں ایک مضبوط اور ترقی یافتہ ہندوستان بنانے کی ترغیب دیتی ہے۔ چار سال قبل 14 فروری کو جموں و کشمیر کے پلوامہ میں دہشت گردانہ حملہ ہوا تھا۔ سہ پہر تقریباً 3 بجے، جیش محمدکے ایک دہشت گرد نے سری نگر۔ جموں قومی شاہراہ پر سینٹرل ریزرو پولیس فورس (سی آر پی ایف) کے قافلے میں دھماکہ خیز مواد سے بھری گاڑی کوٹکرادی تھی۔ اس حملے میں 40 فوجی شہید ہوئے تھے۔
واضح رہے کہ آج پلوامہ حملے کی چوتھی برسی ہے۔ جموں وکشمیرکے پلوامہ میں ہوئے جوانوں کی ہلاکت کو آج یاد کیا جا رہا ہے۔ سی آر پی ایف اور دیگر سیکورٹی فورسز نےبھی آج 40 جوانوں کو خراج عقیدت پیش کیا۔ کشمیر پولیس اور فوج نے یہاں پلوامہ کے شہداء کی یادگار پر پھولوں کی چادر چڑھائی۔ سی آر پی ایف کے خصوصی ڈائریکٹر جنرل دلجیت سنگھ چودھری کی قیادت میں فورس کے افسران، جموں و کشمیر پولیس اور فوج نے پھول چڑھائے۔