پی ڈی پی لیڈر یاسر ریشی پولیس اسٹیشن طلب

پی ڈی پی کے وحید الرحمن پرہ کو گزشتہ روز قومی تحقیقاتی ایجنسی کی جانب سے پوچھ تاچھ کیے جانے کے بعد منگل کے روز یاسر ریشی کو بھی پولیس اسٹیشن طلب کیا گیا۔

پیپلز ڈیموکریٹک پارٹی (پی دی پی) لیڈر یاسر ریشی کو منگل کے روز جموں و کشمیر پولیس نے تھانے میں طلب کیا۔

ای ٹی وی بھارت سے بات کرتے ہوئے ریشی کا کہنا تھا کہ ’’مجھے پولیس نے آج صبح سرینگر کے راج باغ تھانے میں طلب کیا۔ مجھ سے کوئی پوچھ تاچھ نہیں کی گئی بس (تھانے میں) بٹھا کے رکھا۔‘‘

انہوں نے دعویٰ کیا کہ ’’انتظامیہ کی جانب سے آنے والے ڈسٹرکٹ ڈیولپمنٹ انتخابات کے پیش نظر ہم پر دباؤ بنانے کی کوشش کی جا رہی ہے اور ایک مخصوص پارٹی کو فائدہ پہنچایا جا رہا ہے۔‘‘

وہیں پولیس كا کہنا ہے کہ ’’ریشی کو احتیاطی اقدامات کے تحت بلایا گیا تھا۔ اُن کو حفاظتی احکامات کے بارے میں جانکاری فراہم کر کے واپس بھیجا گیا۔‘‘

قابل ذکر ہے گزشتہ روز قومی تحقیقاتی ایجنسی نے دیویندر سنگھ معاملے کی تحقیقات کے چلتے پی ڈی پی کے وحید الرحمن سے بھی پوچھ تاچھ کی گئی جو منگل کو بھی جاری رہی۔